२० असार, काठमाडौं ।
पार्टी फुटको संघारमै रहेको सत्तारुढ नेकपा एमालेका दोस्रो तहका नेताहरू पार्टी बचाउँन अन्तिम दौडधुपमा लागेका छन् ।
नेपाल समूहका नेताहरु भीम आचार्य, गोकर्ण विष्ट, घनश्याम भुसाल र सुरेन्द्र पाण्डे आज विहान पनि माधव नेपाल निवास कोटेश्वर पुगेका छन् । नेताहरुले पार्टी पुनर्मिलनमा गम्भीर हुन माधव नेपाललाई आग्रह गरेको बताइएको छ ।
त्यस्तै ओली पक्षका सुवास नेम्वाङ, विष्णु पौडेल र शंकर पोखरेल पनि नेपाल निवास कोटेश्वर पुगेका हुन् ।
एमालेको केन्द्रीय कमिटी बैठले समयसीमा तोकेरै कांग्रेस सभापति शेरबहादुर देउवालाई प्रधानमन्त्री बनाउन बुझाइएको हस्ताक्षर फिर्ता लिन निर्देशन दिएको थियो ।
उक्त हस्ताक्षर फिर्ता नलिनेहरू एमाले नहुने ओलीले बताइसकेका छन् । यता माधव नेपालले भने हस्ताक्षर फिर्ता नहुने पटक–पटक बताउँदै आएका छन् ।
