२१ असार, काठमाडौं ।
नेपाली कांग्रेसका राष्ट्रिय सभा सदस्य रमेशजङ्ग रायमाझीले राष्ट्रिय सभाको बैठकमा कालो टोपी उचालेर विरोध जनाएका छन् । राष्ट्रिय सभाको सोमवारको बैठकको विशेष समयमा बोल्दै राष्ट्रिय सभा सदस्य रायमाझीले सडकमा कालो झण्डा लिएर उत्रने अवस्था नरहेको भन्दै राष्ट्रिय सभाको बैठकमा नै कालो क्याप उचालेर प्रतिकात्मक रूपमा विरोध जनाएको बताए ।
शिरदेखि पाउसम्म कालो पोसाकमा बैठकमा सहभागी भएका रायमाझीले देशले थाहा पाओस् भन्दै सरकारको र प्रतिनिधि सभाको विघटनको विरोधमा आफूले कालो झण्डाको रूपमा क्याप प्रस्तुत गरेको बताए । उनले टाउकोमा लगाएको कालो क्याप उठाएर घुमाउँदै सभामा उपस्थित सबैलाई देखाउँदै भने, मैले सिम्बोलिक रूपमा यो सरकारको विरुद्धमा र प्रतिनिधि सभा विघटनको विरुद्धमा यो आवाज उठाइरहेको छु ।
प्रधानमन्त्रीले प्रतिनिधि सभा विघटन गरिसकेपछि लाखौँ जनता सडकमा कालो झण्डा बोकेर निस्कनुपर्नेमा कोरोनाको जोखिम बढेकाले निस्कन नसकेको अवस्थामा अलग पोसाकमा उपस्थित भएर सभामा नै प्रतिगमनको विरोध गरेको बताए ।
राष्ट्रिय सभा सदस्य रायमाझीले प्रधानमन्त्री केपी शर्मा ओलीले नैतिकता गुमाइसकेको आरोप लगाएका छन् । प्रधानमन्त्री ओली राजनीतिक, नैतिक लगायत सबै दृष्टिकोणबाट असफल भइसकेकाले असफल प्रधानमन्त्रीको रूपमा साबित भएको उनले दाबी गरे ।
