२२ असार, काठमाडौँ ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ एमालेका वरिष्ठ नेता माधवकुमार नेपाललाई भेट्न कोटेश्वर पुगेका छन् ।
माओवादी केन्द्रका केन्द्रिय सदस्य महादेव यादवको निधनपछि श्रद्धाञ्जली अर्पण गर्न जनकपुरधाम पुगेका अध्यक्ष प्रचण्ड सीधै कोटेश्वरस्थित नेपाल निवासमा पुगेका हुन् । हाल दुई नेताबीच छलफल जारी रहेको स्रोतले बताएको छ ।
यता, पार्टीको आन्तरिक विवाद समाधानका लागि नेकपा एमालेको कार्यदलको बैठक सिंहदरबारस्थित अर्थ मन्त्रालयमा बसिरहेको छ । एमालेको विवाद सकारात्मक दिशामा अघि बढेका बेला प्रचण्ड–नेपालको भेटलाई अर्थपूर्णरुपमा हेरिएको छ ।
एमालेका अध्यक्ष एवं प्रधानमन्त्री केपी शर्मा ओलीसँग असन्तुष्ट रहेको नेपाल पक्षले विपक्षी गठबन्धनलाई साथ दिएको छ । नेपाली प्रतिनिधिसभा विघटन र कांग्रेसका सभापति शेरबहादुर देउवालाई प्रधानमन्त्री बनाउन माग गर्दै नेपाल पक्षका २३ जना प्रतिनिधि सभा सदस्यले सर्वोच्च अदालतमा रिट दिएका छन् । उक्त रिटको सुनुवाई सकिएर असार २८ गते फैसला आउँदैछ ।
ओली पक्षले नेपाल पक्षसँग उक्त रिटबाट हस्ताक्षर फिर्ता लिनुपर्ने अडान राखेको छ भने नेपाल पक्षले भने एमालेको पार्टी कमिटी माओवादी केन्द्रसँग एकता हुनुअघिको अवस्थ अर्थात् २ जेठ २०७५ मा फर्किनुपर्ने अडान राखेका छन् ।
