२४ असार, काठमाडौं ।
बाढी र पहिरोका कारण १८ वटा राजमार्ग तथा सडक बन्द रहेका छन् । सडक विभागका अनुसार पूर्व–पश्चिम राजमार्ग अन्तर्गत नवलपरासीको कावासोतीमा बाढीले सडक नै बगाएको छ । अहिले सयौँ गाडी लाममा लागेका छन् । गैँडाकोटदेखि बुटवल पुग्न निकै समस्या रहेको प्रहरीले जनाएको छ ।
यस्तै मुग्लिन–नारायणगढ सडक बन्द हुने र खुल्ने क्रम चलिरहेको छ । सेती दोभानमा बिहान ठूलो पहिरो खसेपछि बन्द भएको सडक दिउँसोदेखि खुलेको छ । मुग्लिन–नारायणगढ सडकको ठाउँ–ठाउँमा माथिबाट ढुङ्गा खस्ने क्रम चलिरहेकाले गाडी नियमित चल्न सकेका छैनन् ।
यद्यपि हिजो बुधवारको तुलनामा आज धेरै गाडीलाई वारपार गराउन सफल भएको जिल्ला ट्राफिक प्रहरी कार्यालय चितवनले जनाएको छ ।
यस्तै सिद्धार्थ राजमार्ग अन्तर्गत रुपन्देहीदेखि पोखरासम्मका विभिन्न ठाउँमा सडक बन्द छ । पाल्पाको झुम्सा, हिउँदे खोला, सिद्धबाबा, पिपलडाँडा लगायतका ठाउँमा पहिरोले सडक बन्द छ ।
मध्यपहाडी लोकमार्ग अन्तर्गत पर्वतको दोविल्ला र नयाँ पुलमा पनि पहिरोले सडक बगाउँदा गाडी चल्न सकेका छैनन् । ललितपुर–मकवानपुरका विभिन्न ठाउँमा पहिरो जाँदा कान्ति राजपथ पनि बन्द रहेको छ ।
यस्तै लमजुङबाट मनाङ जाने सडक, सिन्धुपाल्चोक, रसुवा लगायतका ठाउँमा पनि सडक बन्द रहेको सडक विभागले जनाएको छ ।
