२८ असार, काठमाडौँ ।
नेकपा एमालेका वरिष्ठ नेता माधवकुमार नेपालले सर्वोच्च अदालतको फैसलाले ‘प्रधानमन्त्रीले जथाभावी गर्न पाउँदैनन्’ भन्ने सन्देश दिएको बताएका छन् ।
सोमबार सर्वोच्चले प्रतिनिधिसभा पुनःस्थापना गर्दै शेरबहादुर देउवालाई प्रधानमन्त्री नियुक्तिका लागि परमादेश जारी गर्ने फैसला गरेपछि नेता नेपालले प्रधानमन्त्रीले जथाभावी गर्न पाउँदैनन् र राज्यका अन्य निकाय पनि संविधानको दायरामा बस्नुपर्छ भन्ने सन्देश दिएको बताएका हुन् । यसले अदालतको भूमिका र मर्यादालाई माथि उठाएको उनको भनाई छ ।
यस्तै, नेता नेपालले मृत्युशय्यामा पुगिसकेको संसद्लाई सर्वोच्चले जोगाउने काम गरेको भन्दै प्रशंसा पनि गरेका छन् । ‘झन्डै मृत्युशय्यामा पुगिसकेको संसदलाई दोस्रो पटक जोगाउने काम भयो । नेपालको इतिहासमा एउटै प्रधानमन्त्रीले पटकपटक प्रतिनिधिसभालाई विघटन गर्ने काम भइरहेको थियो ।’ उनले भनेका छन् ।
