७ साउन, काठमाठौं ।
नेपाली कांग्रेसका सांसद दिव्यमणि राजभण्डारीले बोइङदेखि वाइडबडी खरिदको समयसम्म भएको भ्रष्टाचारमा मन्त्री, मन्त्रालयमा कार्यरत कर्मचारीमात्र नभइ नेपाल वायु सेवा निगमका कर्मचारीको पनि मिलेमतो रहेको बताएका छन् ।
सङ्घीय संसद्को अन्तर्राष्ट्रिय सम्बन्ध समितिको वायु सेवा हेर्ने उपसमितिको संयोजक रहेका सांसद राजभण्डारीले बिहीवार न्यु रोडमा रहेको वायु सेवा निगमको प्रधान कार्यालयमा भएको विरोध प्रदर्शन कार्यक्रममा बौल्दै निगमको बेथितिमा कर्मचारीको पनि हात रहेको बताए ।
सांसद राजभण्डारीले अहिलेको परिस्थितिमा ५१ प्रतिशत स्वामित्व सरकारको हुनुपर्ने बताए । उनले भने, ‘हामीलाई थाहा नै छ, बोइङ खरिदको समयदेखि वाइडबडी खरिदको समयसम्म भएको भ्रष्टाचारमा सरकारका मन्त्री, नेपाल सरकारमा काम गर्नेमात्र नभइ निगममा कार्यरत कर्मचारीको पनि संलग्नता छ, ५१ प्रतिशत स्वामित्व नेपाल सरकारको हुन्छ भनेको थियो तर त्यो मैले देखिनँ, नागरिक र कर्मचारीको हकहितका लागि ५१ प्रतिशत स्वामित्व सरकारको हुनैपर्छ ।’
सांसद राजभण्डारीले निगमलाई निजीकरण गर्नुपर्छ भन्ने नभइ देशको स्वार्थ, स्वाधीनता र इज्जत गुम्न दिन नहुने बताए । साथै उनले लोकतन्त्र, व्यवस्थापन र प्रजातन्त्रमा भन्ने एउटा, देख्ने एउटा र गर्ने एउटा भइरहेको समेत आरोप लगाएका छन् । एकातिर कर्मचारी कटौती हुने र अर्कोतिर आफ्ना मान्छे राख्ने र जीपीडीको ७० हजारबाट चार लाख तलब जाने भन्दै उहाँले यो न्यायोचित नभएको बताए ।
