१३ साउन, पोखरा ।
गण्डकी प्रदेशकी निवर्तमान प्रदेश प्रमुख सीताकुमारी पौडेलले आगामी दिनमा पार्टीका खुला राजनीतिमा नै सक्रिय रहने बताएकी छन् । बुधबार प्रदेश प्रमुखको निवासमा पत्रकारसँग भेटघाट गर्दै पौडेलले प्रदेश प्रमुख हुनुभन्दा अघिजस्तै पार्टीको खुला राजनीतिमा रहने बताएकी हुन् ।
पौडेलले संघीय लोकतान्त्रिक गणतन्त्रको पक्षधर भएकाले आफूलाई पदमुक्तको निर्णयले दुस्खी नबनाएको बताएकी छन् । पौडेलले भनिन्– ‘म समाजको विकासका लागि हिजो जसरी सक्रिय थिएँ, आउने दिनमा पनि मेरो हैसियतमा रहेर निरन्तर क्रियाशील भइनै रहने छु । संघीय लोकतान्त्रिक गण्तन्त्रको पक्षधर भएकाले पनि म पदमुक्त हुँदा कत्ति दुखी भएकी छैन । यस्ता निर्णय स्वाभाविक लाग्छन् । तर, राजनैतिक अस्थिरताले देश बन्दैन, यो सत्य हो ।’ उनले गण्डकीमा रहँदा प्रदेशको बृहत् विकासको लागि शिक्षा, स्वास्थ्य, कृषि, पर्यटनमा जोड दिँदै सरकारसँग समन्वय गरेको बताएकी छन् ।
पौडेल संविधानको धारा १६३ को उपधारा २ बमोजिम राष्ट्रपति विद्यादेखी भण्डारीबाट २०७८ वैशाख २० मा नियुक्त भएकी थिइन् । केपी शर्मा ओली नेतृत्वको सरकारले माओवादीका अमिक शेरचनलाई पदमुक्त गर्दै पौडेललाई प्रदेश प्रमुखमा नियुक्त गरेको थियो । ओलीको पालामा गण्डकीबाट पदमुक्त बनेका शेरचन मंगलबार राष्ट्रपतिबाट पुनस् लुम्बिनी प्रदेशको प्रमुखमा नियुक्त भएका छन् ।
