१८ साउन, काठमाडौं ।
दार्चुलमा तुइनबाट खसेर नेपाली युवक जयसिंह धामी वेपत्ता भएको घटनाको छानविन गर्न गृह मन्त्रालयले समिति गठन गरेको छ ।
मन्त्रालयका सहसचिव जनार्दन गौतमको संयोजकत्वमा पाँच सदस्यीय समिति गठन गरेको प्रवक्ता फणीन्द्रमणि पोखरेलले जानकारी दिए ।
समितिमा नेपाल प्रहरीका प्रहरी नायव महानिरीक्षक पुरुषोत्तम कंडेल, राष्ट्रिय अनुसन्धान विभागका अनुसन्धान निर्देशक हुतराज थापा, सशस्त्र प्रहरी बल नेपालका सशस्त्र प्रहरी वरिष्ठ उपरीक्षक सुरेशकुमार श्रेष्ठ र जिल्ला प्रशासन कार्यालय, दार्चुलाका सहायक प्रमुख जिल्ला अधिकारी ज्योत्सना भट्ट सदस्य रहेका छन् ।
छानविन समितिलाई १० दिनको समय दिइएको प्रवक्ता पोखरेलले जानकारी दिए। गत शुक्रबार व्याँस गाउँपालिकाका ३३ वर्षीय धामी दार्चुलास्थित महाकालीमा तुइनबाट तर्ने भारतीय सुरक्षा बल (एसएसबी)ले तुइन काटिदिँदा उनी नदीमा खसेका थिए । तर भारतीय पक्षले भने आफूहरुले तुइन नकाटेको बताइरहेको छ ।
