२० साउन, विराटनगर ।
प्रहरी जवान पदको परीक्षामा सहभागी ६ जना नक्कली परीक्षार्थीलाई प्रहरीले पक्राउ गरेको छ । बुधबार एक नम्बर प्रदेश प्रहरी तालिम केन्द्र रानी, विराटनगरमा संचालित प्रहरी जवान पदको परीक्षामा सहभागी उनीहरुलाई पक्राउ गरी अनुसन्धान थालिएको जिल्ला प्रहरी कार्यालय मोरङले जनाएको छ ।
पक्राउ पर्नेमा भोजपुरको पौवादुङ्मा गाउँपालिका–६ का २३ वर्षीय सुर्य राई,१९ वर्षीय सागर राई, २२ वर्षीय संगम राई रहेका छन् । त्यस्तै धनकुटाको धनकुटा साँगुरीगढी–८ का १९ वर्षीय सरोज राई, २७ वर्षीय राज कुमार राई र शहिदभूमि –३ का २१ वर्षीय खपाङ राई रहेको जिल्ला प्रहरी कार्यालय मोरङका प्रवक्ता प्रहरी नायब उपरीक्षक दिपक श्रेष्ठले जानकारी दिए ।
पौवादुङ्मा गाउँपालिका–६ बस्ने सुर्य राईले प्रहरी जवान पदमा नयाँ भर्ना गराई दिन्छु भनि संगम राई र सागर राईबाट प्रतिव्यक्ति एकलाख अठार हजार रुपैँया र धनकुटाका साँगुरीगढी–८ का सरोज राईबाट दुई लाख लिएको प्रारम्भिक अनुसन्धानबाट खुल्न आएको उनले बताए ।
उनीहरुलाई पक्राउ गरी आवश्यक कानूनी कारवाहीको लागि जिल्ला प्रहरी कार्यालय मोरङमा बुझाईएकोमा शिक्षा ऐन २०२८ को दफा १७ को १ (क) बमोजिम परीक्षा सम्बन्धी कसूरमा जिल्ला प्रशासन कार्यालय मोरङबाट दिन ५ को म्याद लिई थप अनुसन्धान कार्य भई रहेको प्रहरीले जनाएको छ ।
