२८ साउन, काठमाडौं ।
उपराष्ट्रपति कार्यालयमा कार्यरत नेपाल सरकारको शाखा अधिकृत हुँ भन्दै ठगी गरेको अभियोगमा कीर्तिपुर नगरपालिका-७ बस्ने डोटी केआईसिंह गाउँपालिका-६ घर भएका २६ वर्षीय किशोर भट्ट/कुशल भट्ट भन्ने केशवराज भट्टलाई मंगलबार प्रहरीले पक्राउ गरेको छ ।
केशवराजले निजामती कर्मचारीको पोशाक लगाएर उपराष्ट्रपति कार्यालयको नाम दुरुपयोग गरि बिभिन्न व्यक्तिहरुलाई झुक्याइ ठगी गरिरहेको भन्ने सूचनाको आधारमा महानगरीय अपराध महाशाखा मिनभवनबाट खटिएको प्रहरीले उनलाई कलंकी स्युचाटारबाट पक्राउ गरेको हो ।
उनी २०७५ चैत २६ गते साइबर क्राइम र ठगी मुद्दामा पक्राउ परी १ वर्ष कैद र ३० हजार रुपैयाँ जरिवानाको सजाय भुक्तान गरिसकेको तथा कतिपय व्यक्तिहरुलाई सामाजिक सञ्जाल मार्फत् चिनजान गरि साथी बनि आफू परराष्ट्र मन्त्रालयको सह-सचिव समेत हुँ भनि विश्वासमा पारी ठगी गर्दै आएको प्रारम्भिक अनुसन्धानबाट खुल्न आएको छ ।
उनको साथबाट प्रहरीले १ थान विद्यार्थी परिचयपत्र, १ थान ब्लड ग्रुप कार्ड, १ थान एटिएम कार्ड र १ थान मोबाइल समेत बरामद गरेको छ ।
उनीमाथि थप अनुसन्धान भइरहेको उक्त महाशाखाले जनाएको छ ।
