२८ साउन, काठमाडौं।
निवर्तमान अर्थमन्त्री विष्णु पौडेलले अर्थमन्त्री जनार्दन शर्माले प्रतिनिधि सभामा प्रस्ततु गरेको श्वेतपत्रलाई आरोपपत्र भएको बताएका छन्।
प्रतिनिधि सभाको बिहीबारको बैठकमा विशेष समय लिएर बोल्दै पौडेलले कोरोना महामारीका कारण आर्थिक गतिविधि र विकास खर्च हुन नसकेको प्रतिकुल अवस्थालाई विगतका अनुकुल अवस्थासँग तुलना गरिएको बताए ।
उनले भने–‘ देशको वर्तमान अवस्थाको आर्थिक स्थितिको जानकारी भनेर अर्थमन्त्रीले प्रस्तुत गर्नुभएको उक्त आलेख सरसर्ती सुन्दा र गहिरोगरी अध्ययन गर्दा अघिल्लो सरकारका कामहरुका बारेमा अघिल्लो सरकारको तथ्यहीन आलोचना र विरोधमा केन्द्रित भएको एउटा आरोपपत्रमा प्रस्तुत भएको पाएँ ।’
उनले सत्ता पक्ष र विपक्षका बीचमा नीति विचार र दृष्टिकोणमा मतभिन्नता हुनसक्ने भए पनि मुलुकको आर्थिक अवस्थाको तथ्यांकको बारेमा कुनै विमति हुन नहुने बताए।
उनले आर्थिक वर्ष २०७६(७७ को समय विश्व अर्थतन्त्र साढे ३ प्रतिशतले ऋणात्मक हुँदा नेपाली अर्थतन्त्र २ प्रतिशत मात्रै ऋणात्मक हुनु सुखद भएको बताए ।
‘कोभिड अवधिको वृद्धिदरको सहारा लिएर आर्थिक वर्ष ०७५-७६ मा भएको ७ प्रतिशतको वृद्धिदरलाई बिर्सन खोजिएको छ’ पूर्वअर्थमन्त्री पौडेलले भने ।
कोरोना महामारीकै कारण विकास खर्च हुन नसकेको भन्दै पौडेलले श्वेतपत्रमा त्यसलाई उल्लेख नै नगरिएको बताए । अघिल्लो सरकारले सार्वजनिक ऋण धेरै लिएको विषय पनि श्वेतपत्रमा समेटिएको थियो । तर पूर्वमन्त्री पौडेलले सार्वजनिक ऋण विकास खर्चमा मात्र लगाएको दावी गरे ।
उनले अहिलेको सरकारले बजेट प्रतिस्थापन विधेयक ल्याउने तयारी गरेको भन्दै आफूले ल्याएको भन्दा लोकप्रिय र सबैले मन पराउने बजेट ल्याउन चुनौती दिए ।
उनले भने– ‘अघिल्लो सरकारले ल्याएको बजेट सबै क्षेत्रले स्वागत गरेको छ । ठीक छ प्रतिस्थापन विधेयक ल्याउनुस्, तर हामीले प्रस्तुत गरेको भन्दा राम्रो ।’
