३० साउन, काठमाडाैँ ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले एमसीसी, लिपुलेक, कालापानी र लिम्पियाधुराको प्रश्नलाई कूटनीतिक संवादको माध्यमबाट हल गरिने बताएका छन् । शनिबारदेखि सुरु भएको माओवादी केन्द्रीय कमिटी बैठकमा राजनीतिक र संगठनात्मक प्रस्ताव प्रस्तुत गर्दै उनले यस्ताे बताएका हुन् ।
‘एमसीसी, लिपुलेक, कालापानी र लिम्पियाधुराको प्रश्नलाई पार्टीको घोषित नीति अनुसार कूटनीतिक संवादको माध्यमबाट हल गर्ने प्रयत्न गरिने छ’, प्रचण्डको प्रतिवेदनमा उल्लेख छ।
प्रचण्डको प्रतिवेदनमा नेकपा गठन गर्नु ठीक भएता पनि केपी शर्मा ओलीको कारण विघटन हुन पुगेको उल्लेख छ। उनले भनेका छन् ,’तत्कालीन माओवादी केन्द्र र एमालेबीच भएको एकता वस्तुतः सही हुँदाहुँदै पनि केपी ओली र उनको गुटमा देखा परेको अहंकार, दम्भ, पदलोलुपता, राष्ट्रिय आत्मसमर्पणवाद र लक्षिणपन्थी अवसरवादका कारण नेकपा विघटन हुन पुग्यो ।’
उनले नेकपाको स्वामित्व आफूहरूले लिनुपर्ने प्रस्ताव प्रस्तुत गरेका छन्।
