२ भदाै, काठमाडौं ।
नेपाल विद्युत प्राधिकरणको कार्यकारी निर्देशकमा कुलमान घिसिङको नियुक्ति बदरको माग गर्दै परेको रिटमाथि आज सुनुवाई हुँदैछ ।
निर्वतमान निर्देशक हितेन्द्रदेव शाक्यले दायर गर्नुभएको रिट माथिको सुनुवाई न्यायाधीश कुमार रेग्मीको इजलासमा परेको छ ।
आफुले उक्त पदबाट राजीनामा नै नदिएको अवस्थामा भएको नियुक्त कानुन सम्बत् नभएको भन्दै शाक्यले रिट दायर गरेका थिए ।
प्राधिकरणको कार्यकारी निर्देशक रहेकै बेला ऊर्जा आयोगको विशेष सदस्य बनाइएका शाक्यले आफूले सो पद स्वीकार नगरेको भन्दै कुलमान घिसिङको नियुक्ति गैरकानूनी भएको दावी गर्दै आएका छन् ।
सर्वोच्च अदालतमा सोमबार दर्ता भएको शाक्यको रिट निवेदनमा आफ्नो सहमति बेगर विद्युत प्राधिकरणबाहिर स्थानान्तरण गर्न नमिल्ने भन्दै उनले आफुले राजीनामा पनि नदिएको र कुनै स्पष्टीकरण समेत नसोधिएको अवस्थामा आफू विद्युत प्राधिकरणको कार्यकारी निर्देशकमै कायम रहेको दाबी गरेका छन् ।
आफूले राजीनामा पनि नगरेको र पदबाट नहटाइएको अवस्थामा सरकारले गैरकानूनी रूपमा घिसिङलाई नियुक्त गरेर एउटै पदमा दुई व्यक्ति कायम गरेको शाक्यले जिकिर गरेका छन् ।
उनले आफ्नो कार्य सम्पादन सम्झौतामा राजीनामा गरेको वा प्रक्रिया पूरा गरी बीचमा हटाएको अवस्था बाहेक आफ्नो पदावधि २०८१ साल माघ २८ गतेसम्म रहने भन्दै आफ्नो पक्षमा अन्तरिम आदेश माग गरेका छन् ।
