८ भदौ, काठमाडौं ।
नेकपा एमाले स्थायी कमिटीको बैठक शुरु भएको छ । बैठक ललितपुरको च्यासलस्थित तुल्सीलाल स्मृति भवनमा सुरु भएको हाे ।
१० बुँदे सहमति कार्यान्वयन गर्ने अध्यक्ष केपी शर्मा ओलीको प्रतिवद्धतापछि बोलाइएको स्थायी कमिटी बैठकमा लामो समय माधवकुमार नेपाल समूहमा रहेका, तर उनको नयाँ पार्टीमा नगएका १० नेताहरु पनि सहभागी भएका छन् । बैठकमा माओवादी केन्द्र परित्याग गरेर आएका पूर्व माओवादी नेताहरु समेत सहभागी छन् । पूर्वमाओवादी नेताहरु रामबहादुर थापा बादल, टोपबहादुर रायमाझी, लेखराज भट्ट र मणिचन्द्र थापा पनि बैठकमा पुगेका हुन् ।
ओलीले १० बुँदे सहमति गर्दा २ जेठ २०७५ को अवस्थाको संरचना अनुसार पार्टीलाई बढाउने भनेका थिए । जस अनुसार नवौं महाधिवेशनबाट निर्वाचित कमिटी र त्यसपछि २ जेठ २०७५ सम्म विभिन्न कमिटीहरुमा नियुक्तहरु मात्र रहनेछन् । तर, माओवादीबाट प्रवेश गरी विभिन्न कमिटीमा रहेकाहरुलाई स्थान दिन नहुनेमा माधव नेपाल खेमाका नेताहरु थिए ।
बैठकले पार्टी कमिटीहरुलाई २ जेठ २०७५ मा फर्काउने १० बुँदे सहमतिअनुसार कार्यतालिका बनाउने नेताहरुले बताएका छन् ।
