१० भदौ, काठमाडौं ।
नेकपा एकीकृत समाजवादीका अध्यक्ष माधवकुमार नेपालले केपी शर्मा ओली कम्युनिस्ट आन्दोलन र सिद्धान्तबाट धेरै पर पुगिसकेको आरोप लगाएका छन् ।
काठमाण्डौमा आज बिहीवार भएको पत्रकार सम्मेलनमा अध्यक्ष नेपालले एमाले अध्यक्ष केपी शर्मा ओली अहिले भ्रष्ट र बिचौलियाको सङ्गतमा लागेर कम्युनिस्ट सिद्धान्तबाट विचलित भइसकेको बताए ।
‘पार्टीको अध्यक्ष भएपछि सबैको कुरा सुन्नपर्थ्यो, कम्युनिस्ट आदर्शलाई फलो गर्नुपर्थ्यो तर ओलीले आफ्नो प्रशंसा गर्दै नाच्नेलाई मात्रै आफ्नो ठाने, हामीजस्ता क्रान्तिकारीलाई घोचपेच र पीडित बनाउने मात्रै काम गरे’, नेपालले भने ।
नेता नेपालले पहिले आफ्नो पक्षमा रहेका नेताहरू अहिले ओली पक्षमा गएकोमा दु;ख नलागेको बताए । ‘कोही बीचैमा थाक्दा रहेछन्, आँट घट्दो रहेछ । थाक्ने थाकिरहन्छन्, अगाडि बढ्नेहरू र क्रान्तिकारी दिशामा पार्टीलाई लैजान चाहनेहरू अघि बढिरहन्छन् । अब छुटेका र छुट्न चाहेका साथीको कुरा नगरौँ, हामी क्रान्तिकारी ढङ्गले अघि बढ्ने बाटोमा लागिसक्यौँ’, अध्यक्ष नेपालले भने ।
अहिले आफ्नो साथ छाडेकाहरूले केही समयअघि नै निर्वाचन आयोगमा छुट्टै दल दर्ता गरेको दाबी गर्दै अध्यक्ष नेपालले कुनै दिन ओली समूहमा लागेकोमा पछुतो लागेमा फेरि फर्कने पनि बताए ।
