१६ भदौ, काठमाडौं ।
नेपाली राष्ट्रिय फुटबल टोलीका मुख्य प्रशिक्षक अब्दुल्लाह अलमुताइरीले भारतविरुद्धको मैत्रीपूर्ण खेलमा नेपाली टोलीले जितका लागि खेल्ने र गर्व गर्नलायक प्रदर्शन गर्ने बताएका छन् । बुधबार प्रि म्याच कन्फ्रेन्समा बोल्दै अलमुताइरीले यस्तो बताएका हुन् । नेपाल र भारतबीच दुई मैत्रीपर्ण खेलको पहिलो खेल बुधबार साँझ ५ः३० बजे दशरथ रंगशालामा हुँदैछ ।
प्रि म्याच कन्फ्रेन्समा अलमुताइरीले भने, ‘समर्थक लागि खुसी होइन गर्व गर्न लायक प्रदर्शन गर्नेछौं । यो दुई खेल सबैले यो खेल हेर्ने छन् । हामी इतिहास हरेर होइन भविष्यका लागि खेल्नेछौं ।’
अलमुताइरीले भारतविरुद्ध नेपालको विगतमा राम्रो नतिजा नभएपनि त्यसले असर नपर्ने बताए । उनले थपे, ‘विगतको नतिजा हेर्दा हामीले भारतविरुद्ध २ जित मात्र हासिल गरेका रहेछौं । तर त्यसले यो दुई खेलमा असर गर्दैन । हामी भविष्यलाई ध्यानमा राखेर तयारी गरिरहेका छौं । यो दुवै खेलमा जित हासिल गर्ने नै लक्ष्य हुनेछ ।’
छ महिना अघि नेपाली टोली सम्हालेका अलमुताइरीको प्रशिक्षणमा नेपाली टोलीले पहिलो पटक दशरथ रंगशालमा खेल्दैछ । ‘नेपालमा त्यो पनि भारतविरुद्ध पहिलो पटक खेल्न पाउँदा खुसी छौं । भारत निकै बलियो टोली हो । वरियतामा हामी भन्दा धेरै माथि छन् । तर हामी उनीहरुलाई सजिलै खेल्न दिने छैनौं,’ उनले भने ।
प्रशिक्षक अलमुताइरीले भारतलाई दुई मैत्रीपूर्ण खेलमा हराउन सकेको खण्डमा फिफा वरियतामा ७ देखि १० स्थान उक्लने सम्भावना रहेको जनाए । भारतविरुद्ध रक्षात्मक रणनीतिमा नखेल्ने र नयाँ खेलाडीले पनि मौका पाउने उनले बताए ।
