१९ भदौ, काठमाडौँ ।
सरकारले हुम्लाको नाम्खामा सीमा सम्बन्धी अध्ययन गर्न गृह मन्त्रालयका सहसचिव जयनारायण आचार्यलाई खटाउने भएको छ । गृह मन्त्रालयले उनलाई संयोजक तोकेर नाम्खा गाउँपालिका वडा नम्बर ५ र ६ मा पर्ने नेपाल–चीन सीमा विवाद अध्ययन गर्न प्रहरी,सशस्त्र प्रहरी र नापी विभागका अधिकारी सम्मिलित समिति गठन गरेको गृह प्रवक्ता फणीन्द्रमणि पोखरेलले जानकारी दिए ।
छानबिन समितिको संयोजक आचार्य सप्तरीका प्रमुख जिल्ला अधिकारी समेत हुन् । अहिले आचार्यको ठाउँमा हालै तुइन घटना छानबिन समितिका संयोजक रहेका सहसचिव जनार्दन गौतमलाई पठाइएको छ ।
समितिमा रहने सदस्यहरुको नाम पठाउन प्रहरी, सशस्त्र र नापी विभागलाई पत्राचार गरिएको छ । भदौ १६ गतेको मन्त्रिपरिषद् बैठकले चीनसँगको सीमा समस्या अध्ययन गर्न भन्दै समिति गठन गर्ने निर्णय गरेको थियो ।
चीनतर्फको सीमा क्षेत्र छुट्याउने ११ र १२ नम्बर स्तम्भको नेपाली भू-भाग मिचिएको भन्दै कर्णाली प्रदेशका कांग्रेस सांसदीय दलका नेता तथा केन्द्रीय सदस्य जीवनबहादुर शाहीले यस विषयमा अनुसन्धान गर्न भन्दै पटकपटक माग गर्दै आएका छन् ।
नाम्खामा सीमा विवादको विषय उठेपछि शुक्रबार नेपालस्थित चिनियाँ दूतावासले नेपालसँग कुनै पनि सीमा विवाद नरहेको बताएको छ । यता पूर्व प्रधानमन्त्री तथा एमाले अध्यक्ष केपी शर्मा ओलीले चीनसँग सीमा विवाद नरहेको बताएका छन् । सरकारको यो निर्णयको विवाद नै नभएको ठाउँमा विवाद झिक्न खोजेको भनेर सत्ता गठबन्धनभित्रै आलोचना भइरहेको छ ।
