२१ भदाै, काठमाडौँ ।
काठमाडौमा सम्पन्न भारतसँगको मैत्रीपूर्ण फुटबल खेलका क्रममा नेपालका राष्ट्रिय फुटबल टिमका कप्तान तथा गोलरक्षक किरण चेम्जोङ नेपालका लागि सर्वाधिक खेल खेल्ने कीर्तिमान बनाएका छन् । भारतविरुद्धको दोस्रो तथा अन्तिम मैत्रीपूर्ण अन्तर्राष्ट्रिय खेलसँगै किरणले यो उपलब्धी हात पारेका हुन् ।
किरणको यो नेपालका लागि ७४ औं खेल हो । पूर्व कप्तान विराज महर्जनको ७३ खेल खेलेका थिए । विराजले नेपालको लागि सर्वाधिक खेल खेल्ने उपलब्धी थ्री नेसन्स कप फाइनलका क्रममा प्राप्त गरेका थिए । विराजले अहिले सन्यास लिइसकेका छन् ।
किरणले बिहीबार भारतविरुद्धको पहिलो मैत्रीपूर्णमा विराजको कीर्तिमान बराबरी गरेका थिए । सन् २००८ मे २४ मा किरणले नेपालका लागि डेब्यु गरेका थिए । एएफसी च्यालेञ्जकप छनोटको मकाओविरुद्ध कम्बोडियाविरुद्धको खेलमा उनी पहिलो पल्ट नेपालका लागि उत्रेका थिए ।
उनलाई जर्मन प्रशिक्षक थोमस फ्लाथले डेब्युको अवसर दिएका हुन् । किरण र विराजपछि रोहित चन्द र पूर्व कप्तान राजुकाजी शाक्य नेपालका लागि सर्वाधिक खेल खेल्ने खेलाडी हुन् । रोहितले नेपालका लागि ६९ पल्ट खेलिसकेका छन् । शाक्यले ६८ क्याप जितेका छन् । राष्ट्रिय टिमका सदस्य रहेका रोहित भने व्यवसायिक फुटबल खेल्ने क्रममा इन्डोनेसियामा छन् । सन् २००८ मा नेपाली राष्ट्रिय टिममा रहेका तीन जना गोलकिपरबीच तीव्र प्रतिस्पर्धा थियो। किरणकुमार लिम्बु, रितेश थापा र विकाश मल्ल मध्ये एक जनालाई पहिलो रोजाइमा खेलाउने निर्णय गर्न प्रशिक्षकलाई गाह्रो पर्थ्यो।
रितेश र विकासभन्दा जुनियर भए पनि किरणलाई आफ्नो उचाइको फाइदा थियो। यसैले ६ फिट २ इन्च अग्ला किरणले सन् २००८ मा राष्ट्रिय टिममा डेब्यू गरे। कम्बोडियामा भएको एएफसी च्यालेञ्ज कपको छनोटमा उनले मकाउविरुद्ध पहिलो रोजाइमा खेल्दै राष्ट्रिय टिममा डेब्यू गरेका थिए ।
मच्छिन्द्र क्लबबाट क्लब करिअर सुरू गरेका चेमजोङले थ्रीस्टार र मनाङ मर्स्याङ्दी जस्ता नेपालका बलिया क्लबबाट खलेको छन् । यी क्लबबाट खेल्दा उनले क्लब र व्यक्तिगत विधाका दर्जनौ अवार्ड तथा उपाधि जितेका छन् ।
