२४ भदाै, काठमाडौं।
प्रधानमन्त्री एवम् नेपाली कांग्रेसका सभापति शेरबहादुर देउवाले गृह जिल्ला डडेल्धुरामा वडा अधिवेशन सार्न निर्देशन दिएका छन् । बिहीबार वरिष्ठ नेता रामचन्द्र पौडेलसँग भएको छलफलका क्रममा उनले गृह जिल्लामा भदौ २५ का लागि तय गरिएको वडा अधिवेशन सार्न निर्देशन दिएको बताएका हुन् ।
छलफलका क्रममा प्रधानमन्त्री देउवाले डडेल्धुरामा देखिएको क्रियाशील सदस्यता विवाद समाधानका लागि अधिवेशन केही दिनका लागि पछाडि धकेल्न भनिसकेको जानकारी आफूहरुलाई दिइएको छलफलमा सहभागी केन्द्रीय सदस्य अर्जुननरसिंह केसीले बताए ।
छलफलमा पौडेल समूहले देउवालाई डडेल्धुरामा देखिएको विवाद विधि र प्रक्रियाअनुरुप टुंग्याउन आग्रह गरेको थियो । ‘हाम्रो प्रमुख चासोमध्ये डडेल्धुरामा देखिएको विवाद पनि थियो । हामीले विधि–प्रक्रियाअनुरुप नै विवाद टुंग्याइयोस् । कहीं पनि हस्तक्षेप नहोस् भन्यौं,’ उनले भने, ‘उहाँ (प्रधानमन्त्री) ले डडेल्धुराको विवाद मिलाउने कोशिस गरिरहेको छु । निर्वाचन सार्न भनेको छु भन्नु भएको छ ।’
छलफलमा पौडेल समूहले क्रियाशील सदस्यता नामावली प्रकाशन हुन बाँकी रहेका २० जिल्लाको नामावली सार्वजनिक गरेर महाधिवेशन सुनिश्चित गर्न, सानेपामा धर्नामा बसेकाहरुको माग सम्बोधन गर्न आग्रह गरेको थियो । नामावली सार्वजनिक हुन बाँकी २० र डडेल्धुराको सदस्यता टुंग्याएर छिटो अधिवेशन नभए भदौ २७ का लागि निर्धारण गरेको गाउँपालिका / नगरपालिका तहको अधिवेशन पनि प्रभावित हुने भन्दै पौडेल समूह दबाब दिएको बताइएको छ ।
