२९ भदाै, सिन्धुली ।
जनता समाजवादी पार्टी नेपालका संघीय परिषद् अध्यक्ष बाबुराम भट्टराईले प्रमुख दलहरुबीच राष्ट्रिय सहमति जुटाएर एमसीसी पास गर्नुपर्ने बताएका छन् । जनता समाजवादीले सिन्धुलीमाढीमा मंगलबार आयोजना गरेको कार्यक्रममा भट्टराईले एमसीसी सहयोगको विरोध हुनु बडो दुर्भाग्यपूर्ण भएको बताए ।
उनले भने, ‘म नै प्रधानमन्त्री भएको बेलामा एमसीसी प्रक्रिया सुरु भएको थियाे । त्यसपछि बनेका सबै सरकारले यसलाई अगाडि बढाएका हुन् । अहिले आएर एमसीसीमा विवाद गर्नु बडो दुर्भाग्यपूर्ण भएको छ ।’
उनले राष्ट्रिय सहमति गरेर यो अनुदान सहयोग लिएर जाँदा नै नेपाललाई उपयुक्त हुन्छ भन्ने आफ्नो पार्टीको धारणा रहेको बताए । उनले भने,‘फेरि हामी कहाँ त जसले जे गरेपनि शंकैशंकाले लंका खान्छ भने जस्तो सबै थोकमा विरोध गर्ने चलन छ । सुरुदेखि भएका सम्झौता यस्तै भएका छन् ।’
एमसीसीलाई लिएर यतिधेरै बहस र विवाद गर्नु आवश्यक नभएको उनले बताए । उनले एमसीसी संसद्बाट अनुमोदन गर्ने आवश्यकता नभएकाे तर यो ठूलो सहयोग भएकाले हाम्रैतर्फबाट संसद्बाट अनुमोदन भन्ने राखिएकाले राष्ट्रिय सहमति आवश्यक भएको हो बताए ।
