७ असाेज, काठमाडौं।
नेपाली कांग्रेसको सभापतिको उम्मेदवारमा दाबी गरेका नेता डा शेखर कोइरालाले पार्टी सभापति पक्षले पार्टी कब्जा गर्न लागेको आरोप लगाएका छन्।
केन्द्रीय कार्यालयमा धर्नामा बसेका जिल्लाका नेताहरुको आन्दोलनमा ऐक्यवद्धता जाहेर गर्न पुगेका कोइरालाले क्रियाशील सदस्यता वितरण र तल्लो तहको नेतृत्व चयनमा पार्टी कब्जा गर्ने तरिकाले जिल्लामा नेताहरुले गुन्डागर्दी देखाएको आरोप लगाए। ७५ वर्षे लामो इतिहासमा अहिलेसम्म कांग्रेसमा कहिल्यै यस्तो नभएको उनको दाबी छ।
उनले भने,‘पार्टी कब्जा गर्ने कार्य स्वीकार्य हुँदैन। गुण्डागर्दी गर्ने यस्ता तत्व जिल्ला जिल्लामा परास्त हुन्छन्।’ आन्दोलनरत कार्यकर्ताप्रति उनले समर्थन रहेको बताए। ‘जुझारू साथीहरू विचलित बनाउन आक्रमण र प्रशासनको दुरुपयोग गर्ने प्रयास भएको छ, तपाईंहरु विचलित नहुनुहोस्’, कोइरालाले भने, ‘त्यस्ता तत्व जिल्ला–जिल्लाबाट विस्थापित हुन्छन् । तपाईंहरू लाग्नुहोस्, हाम्रो पूर्ण समर्थन छ ।’
क्रियाशील सदस्यता विवादले रौतहटका जिल्ला कार्यकर्ता धर्नामा बसिरहेका छन्। डडेलधुरामा भदौ २५ मा गरिएको वडा अधिवेशन प्रति उनले असन्तुष्टि जनाए। संस्थापनइतरको विरोध वीच डडेलधुरामा वडा अधिवेशन गरिएको थियो।
