१० असोज, काठमाडौं ।
सरकारले विदेशी पर्यटकलाई दिदै आएको अनअराइभल भिषा पुनः दिने निर्णय गरेपछि पदयात्री पर्यटकको आगमन बड्ने पर्यटन व्यवसायीहरुले बताएका छन् ।
विदेशी पर्यटकले नेपाललाई पदयात्राका लागि उत्कृष्ट गन्तव्य मान्ने भएकाले भिषामा सहज भएकाले बुकिङ गर्न शुरु गरेको ट्रेकङ एजेन्सीज एसोसिएसन अफ नेपाल (टान) का अध्यक्ष खुमबहादुर सुवेदीले जानकारी दिए ।
पदयात्रामा आउने पर्यटकहरु यस अघि सरकारले अनिवार्य क्वारेन्टिन बस्नुपर्ने व्यवस्था गरेपछि असोज, कात्तिक महिनामा आउने पर्यटकले ९० प्रतिशत बढी पर्यटकले बुकिङ रद्द गराएको सूवेदीले बताए ।
छोटो समयका लागि पदयात्रामा आउनेहरु क्वारेन्टाइन बस्नुपर्ने बाध्यता र भिषा प्रक्रिया झन्झटिलो भएकाले बुकिङ रद्द गराएको उनको भनाइ छ ।
सरकारको निर्णयपछि करिव एक हजार आठ सय ट्रेकिङ कम्पनीहरुमा बुकिङका लागि अफर आउन थालेको टानले जनाएको छ ।
यता पर्वतारोहणमा भने लामोसमय लाग्ने र खर्चिलो हुने भएकाले पर्यटकले समेत योजनाबद्ध रुपमा आउने भएकाले कमै मात्रामा बुकिङ रद्द भएको र पदयात्री पर्यटकहरु धेरैले बुकिङलाई पछाडि सारेको व्यवसायी लोप्साङ शेर्पाले बताए ।
केही पर्यटकले भने बुकिङको समय मात्र पछि सारेका थिए केही दिन अघि सरकारले गरेको निर्णयले पछि नेदरल्याण्डका चार वटा समूहले यसै महिना आउने गरी बुकिङ गरेको उनले बताए ।
नेपालको प्राकृतिक सुन्दरता र सस्तो हुने भएकाले विदेशी पर्यटकको पहिलो रोजाइमै पर्ने गरेछ, सरकारले सहज वातावरण बनाए एक वर्ष भित्रै पर्यटन क्षेत्र पुरानै गतिमा फर्कन सक्ने उनले बताए ।
सगरमाथा आधारशिविर, अन्नपूर्ण सर्किट र अन्य हिमालका आधारशिविर क्षेत्रसम्म पदयात्रा गर्ने र काठमाडौं, पोखरा लगायतका शहरहरुमा भ्रमण गर्ने खालका बढी पर्यटकहरु बुकिङ शुरु गरेको समेत बताए ।
