१२ असाेज, काठमाडाैँ ।
नेपाली हिन्दूहरूको महान् चाड बडादशैं नजिकिँदै जादा बजारमा उपभोक्ताको चाप बढेको छ । पछिल्लो समय कोरोना संक्रमण घटेसँगै चाडबाड लक्षित बजारमा चहलपहल बढेको हो ।
विशेषगरी खाद्यान्न र लत्ताकपडाका पसलमा दशैंलक्षित किनमेल गर्ने उपभोक्ताहरूको भीड बढ्न थालेको हो । आजभोलि काठमाडौंका मुख्य व्यापारिक केन्द्रहरू असन, इन्द्रचोक, न्यूरोड, खिचापोखरी, ठमेल, कोटेश्वर, कलंकी, कालीमाटी, नयाँबजारलगायत क्षेत्रका पसलहरूमा उपभोक्ताको बाक्लो भीड देख्न सकिन्छ ।
कोरोना महामारीको त्रासका कारण अघिल्लो वर्षको दशैंमा धरैजसो उपभोक्ताले बजारसम्म गएर आफूलाई आवश्यक पर्ने सामान किन्न सकेका थिएनन् । जसले गर्दा अघिल्लो वर्षको दशैंलक्षित व्यापार सामान्य अवस्थाको बेलामा भन्दा करीब ८५ प्रतिशतसम्मले घटेको व्यवसायीहरू बताउँछन् । तर, यसपटक बजारमा उपभोक्ताको चाप बढेपनि व्यापारीमा उत्साह भने देखिएको छैन । कोरोनाको कहर नभए पनि सामान नाकामै रोकिएकाले व्यापार नहुने हो कि भन्ने व्यवसायीहरुलाई चिन्ता भएको छ ।
नेपाल–चीन व्यापारमा प्रयोग हुँदै आएको तातोपानी र केरुङ नाकाबाट सामान आयातमा समस्या देखिएपछि व्यापारीले समुद्रीमार्गबाट सामान ल्याउन लागेका छन् । अहिले चीनबाट नेपाल आउने कुल सामानमध्ये ९५ प्रतिशत सामान समुद्रीमार्ग हुँदै मगाइएको हिमालय सीमापार व्यापार संघले बताएको छ । यसले गर्दा महङगी बढ्ने अनुमान गरिएको छ । यसअघि ८५ प्रतिशत सामान समुद्रीमार्ग र १५ प्रतिशत सडकमार्ग हुँदै ल्याइन्थ्यो ।
कोभिडका कारण चीनले पटकपटक उत्तरी नाकामा अवरोध गर्दा व्यापारीहरूले केरुङ र तातोपानीबाट भन्दा समुद्रीमार्गबाट सामान ल्याउन थालेका हुन् । हाल कोरोना महामारीका कारण चीन जान नपाउँदासमेत नेपालका व्यापारी समस्यामा परेका छन् ।
नेपाल राष्ट्रिय व्यवसायी महासंघका अध्यक्ष नरेश कटुवालले व्यापारी चीन जान नपाउँदा समस्यामा परेको बताए । उनले चीन जान नपाउँदा वीच्याटमार्फत सामान अर्डर गर्नुपर्ने बताउदै यसबाट एउटा सामान माग गर्दा अर्को आइपुग्ने समस्या रहेको बताए ।
नेपालमा अन्य समयको तुलनामा दशैं र तिहारजस्ता ठूला चाडपर्वका अवसरमा जुत्ता, चप्पल र लत्ताकपडाको व्यापारमा ४० प्रतिशतभन्दा बढी वृद्धि हुने गर्छ । यस वर्ष यही अनुपातमा व्यापार हुन नसक्ने दखिएको छ । हरेक वर्ष नेपाली व्यापारीहरूले दशैं र तिहारलाई लक्षित गरी छिमेकी मुलुक भारत र चीनबाट मात्रै करीब २५ देखि ३० अर्ब नेपाली रुपैयाँ बराबरको तयारी लत्ताकपडा आयात गर्ने गरेका छन् ।
