१४ असोज, काठमाडौं ।
एभरेष्ट प्रिमियर लिग (ईपीएल) अन्तर्गत आज बिहीबार दुई खेल हुँदै छ।
कीर्तिपुरस्थित टियु क्रिकेट मैदानमा हुने पहिलो खेलमा काठमाडौं किङ्स–११ र चितवन टाइगर्सबीच भिड्दै छन्।काठमाडौं र चितवनबीचको खेल बिहान ९ः३० बजे सुरु हुनेछ।
सन्दीप लामिछानेको कप्तानीमा रहेको काठमाडौं दोस्री जितको खोजीमा रहेको छ। काठमाडौंले पहिलो खेलमा ललितपुर प्याट्रियट्सलाई हराएको थियो।
सोमपाल कामीको कप्तानी रहेको चितवन समेत दोस्रो जितको खोजीमा रहेको छ। पहिलो खेलमा चितवनले विराटनगर वारियर्सलाई हराएको थियो।
यस्तै दिउँसो साढे एक बजे सुरु हुने आजको दोस्रो खेलमा भैरहवा ग्लाडियटर्स र ललितपुर प्याट्रियट्स बीच प्रतिस्पर्धा हुनेछ।
शरद भेषवाकरको कप्तानीमा मैदान उत्रने भैरहवा दोस्रो जित निकाल्न चाहन्छ। भैरहवाले बुधबार विराटनगर वारियर्सलाई हराएको थियो। त्यसअघि भैरहवाले पोखरा राइनोजसँग अंक बाडेको थियो।
ललितपुर भने पहिलो जित निकाल्न चाहन्छ । ललितपुरले दुई खेलमा अंक जोड्न सकेको छैन । ललितपुर बुधबार पोखरासँग पराजित भएको थियो।
प्रतियोगितामा ६ शहरका फ्रेन्चाइज टिमले सहभागिता जनाएका छन्। प्रतियोगिताको विजेताले ५० लाख प्राप्त गर्नेछ भने उपविजेताले १५ लाख पाउने आयोजकले जनाएको छ।
