१४ असोज, काठमाडौं।
नागरिक उड्डयन प्राधिकरणले बुद्ध एयरका पाइलट आङ्गेलु शेर्पालाई उडान भर्न रोक लगाएको छ ।
प्राविधिक समस्या देखिएको जहाजलाई सुरक्षित अवतरण गराएको भनेर प्रशंसा कमाइरहेका उनलाई घटनाको छानविन प्रतिवेदन नआउञ्जेलसम्मका लागि विमान चलाउन रोक लगाइएको हाे ।
घटनाको छानविन भइरहेकाले तत्कालका लागि पाइलट शेर्पालाई उडान भर्नमा रोक लगाइएको नागरिक उड्डयन प्राधिकरणका निमित्त महानिर्देशक राजकुमार क्षेत्रीले जानकारी दिए । उनले भने, ‘घटना छानविन प्रतिवेदन नआउन्जेलसम्मका लागि पाइलट शेर्पालाई उडान नर्भन भनिएको हो । यो नियमित पक्रिया हो ।’
गत सोमबार ८ः३० मा विराटनगरका लागि उडेको ७३ यात्रुसहितको विमान पाङ्ग्रा नखुल्दा पुनः काठमाडौं फर्काइएको थियो । २ घण्डा आकाशमै होल्ड भएको साे जहाज तेल सकेर विमान अवतरण गर्न खोजिएकोमा अचानक पाङ्ग्रा खुलेको थियो । सो जहाज पाइलट आङ्गेलु शेर्पाले उडाएका थिए ।
जहाजमा ६८ वयस्क, २ बच्चा, ३ जना इन्फ्याण्ट गरी ७३ यात्रु रहेका थिए ।
