१६ असाेज, पोखरा ।
पोखरा फेवाताल देखि सराङकोट केबुलकार आगामी पौष १७ गते बाट सञ्चालनमा आउने भएको छ ।
फेवातालको किनारबाट सराङकोटलाई जोड्ने गरी निर्माण भएको अन्नपूर्ण केबलकार अङ्ग्रेजी नयाँ वर्षको अवसर पारेर सञ्चालनमा ल्याउने तयारी गरिएको हो ।
पटक पटक केबुलकार सञ्चालनको मिति तोकिए पनि कोभिड १९ का कारण सञ्चालनमा ल्याउन समस्या सिर्जना भएको थियो ।
केबुलकारले एक पर्यटकीय स्थलदेखि अर्को पर्यटकीय स्थल जोड्ने छ । प्रसिद्ध पर्यटकीय स्थल फेवाताल बाट प्याराग्लाईडिङ गर्ने तथा सूर्योदय, सूर्यास्तसँगै हिमशृङ्खला र पोखराका मनोरम दृश्य नियाल्नका लागि सबैभन्दा प्रख्यात मानिने सराङकोटलाई जोड्ने गरी केबुलकार निर्माण गरिएको हो ।
केबुलकार परियोजनाको करिब सबै जसो काम सम्पन्न भइसकेको र जापनिज प्राविधिक ल्याई परिक्षण पश्चात् केबुलकार सञ्चालन गर्ने तयारी भइरहेको अन्नपूर्ण केबलकार प्रालिका निर्देशक तीर्थराज त्रिपाठीले बताए ।
केबुलकारको स्टेसनसँगै तार टाँग्ने र केबलकारका डिब्बा (गुण्डला) राख्ने लगायतका मुख्य कार्य सबै सकिएको छ । दुई अर्ब रुपैयाँको लगानीमा निर्माण भएको केबलकारमा ८ जनाको सिट क्षमता रहेको १७ वटा डिब्बा र सामान ओसारपसार गर्न एउटा गरी १८ वटा डिब्बा जडान गरिएको छ ।
दुई हजार ४०० मिटर दुरीको उक्त क्षेत्रमा ८ देखि ९ मिनेटमा पुग्न सकिन्छ । केबुलकारमा नेपाली पर्यटकलाई प्रतिव्यक्ति ६ सय रुपैयाँ, अन्य मुलुकका पर्यटकलाई ८ सय रुपैयाँ भाडा निर्धारण गरिएको छ ।
