१६ असाेज, काठमाडौं।
साफ च्याम्पियनसिप २०२१ को पहिलो खेलमा माल्दिभ्सविरुद्ध जित हात पारेपछि नेपाली राष्ट्रिय फुटबल टोलीका प्रशिक्षक अब्दुल्लाह अलमुताइरीले नेपाल जितको हकदार रहेको बताएका छन् ।
जितपछि भएकाे पत्रकार सम्मेलनमा बाेल्दै उनले नेपालले योजना अनुसार नै माल्दिभ्सलाई खेलमा खुलेर खेल्न नदिएको बताए । उनले भने, ‘हामीले माल्दिभ्सको बारेमा राम्रो अध्ययन गरेका थियौं । हामीले उनीहरुलाई घरेलु मैदान र अवस्थाको दबाब महसुस गराउने योजना बनाएका थियौं । गोलरहित बराबरीमा रहनुले पनि उनीहरुलाई समस्या भएको थियो ।’
‘हामीले मिनेट पिछे मिहिनेत गरेर जितको हकदार थियौं । हामीले उनीहरुलाई खुलेर खेल्न अवसर दिएनौं । सेट पिसमा केहि अवसर सिर्जना गरेका थिए, तर ओपन प्लेमा हामीले कुनै अवसर दिएनौं । हामीले पनि पाएका केहि अवसर सदुपयोग गर्न सकेनौं । यो नै फुटबल हो । आजको हाम्रो हिरो मनिष डाँगी रहे,’ प्रशिक्षक अलमुताइरीले भने ।
अलमुताइरीले नेपालकाे निकै राम्रो भविष्य देखेकाे भन्दै भने, ‘मनिषले ठूलो रंगशालामा खेलेको यो पहिलो खेल हो । आयुष घलान अर्का युवा खेलाडी हुन् जो धेरै सम्भावना बोकेका छन् । यो टोलीलाई अझै समय चाहिन्छ । निकै राम्रो भविष्य देखेको छु । ’
प्रशिक्षक अलमुताइरीले अन्त्यमा सबैलाई संयमित रहन पनि आग्रह गरे । ‘ हामीले अहिले उपाधि जितिसकेका छैनौं । सबै संयमित हुन जरुरी छ । भोली विहान हामीले सबै कुरा बिर्सनुपर्छ । हाम्रो ध्यान अब अर्को खेलमा हुनेछ । त्यसैले नेपालमा रहेका सबैलाई पनि शान्त रहन आग्रह गर्दछु।’ उनले थपे ।
नेपालले अब सोमबार श्रीलंकाको सामना गर्नेछ ।
