१६ असाेज, अछाम ।
उच्च रक्तस्रावका कारण अछाममा एक महिलाको मृत्यु भएको छ । जिल्लाको तुर्माखाँद गाउँपालिका वडा नम्बर १ रहफ कि ३० वर्षकी पूर्णकला बिकको मृत्यु भएको जिल्ला प्रहरी कार्यालय अछामले जानकारी दिएको छ ।
बिहीबार राति ८ बजे सुत्केरी बेथा लागेपछि रहफ स्वास्थ्य चौकी लगिएकी बिकको आज बिहान ५ बजे मृत्यु भएको स्वास्थ्य चौकीका अनमी गीता लम्सालले जानकारी दिए ।
घरमा व्यथा लागेकी बिकलाई स्वास्थ्य चौकी लगिएकोमा रक्तस्रावका कारण बच्चा जन्माउन नसक्दा मृत्यु भएको स्वास्थ्य चौकी रहफले जनाएको छ । बिकको यो पाँचौँ बच्चा भएको र यसअघि ३ छोरा र १ छोरी गरी ४ सन्तान रहेका तुर्माखाँद गाउँपालिकाका स्वास्थ्य शाखा प्रमुख एकेन्द्र बुढाले बताए।
भौगोलिक विकटताका कारण समयमै सुविधा सम्पन्न अस्पताल पुर्याउन नसक्दा उनको मृत्यु भएको अछामका प्रमुख जिल्ला अधिकारी रुद्र बहादुर मल्लले बताए।
उनले यसअघि यस्ता प्रकृतिका बिरामी महिलाहरूका लागि राष्ट्रपति महिला उत्थान कार्यक्रम अन्तरगत हेलिकप्टर मार्फत उद्धार गरिँदै आएकोमा यो घटना आफूलाई समयमै जानकारी नभएकाले बिकलाई बचाउन नसकिएको बताए ।
मृतक सुत्केरी विकका श्रीमानको समेत २ महिना अघि मृत्यु भैसकेको स्वास्थ्य शाखा प्रमुख बुढाले जानकारी दिए। आमाबुवा नै बितेपछि बच्चाको बिचल्ली हुने उनको भनाइ छ ।
