२१ असाेज, काठमाडौँ ।
प्रधानमन्त्री शेरबहादुर देउवाले महत्व दिएर राखेका स्वास्थ्य राज्यमन्त्री उमेश श्रेष्ठ पदबाट हट्ने भएका छन् । स्वास्थ्य तथा जनसंख्या मन्त्रालय नेकपा एकीकृत समाजवादीको भागमा परेपछि श्रेष्ठ राज्यमन्त्रीबाट हट्ने लगभग निश्चित भएको हो ।
श्रेष्ठलाई देउवाले १० साउनमा स्वास्थ्य राज्यमन्त्री नियुक्त गरेका थिए । राज्यमन्त्री भएको ७५ दिनमै श्रेष्ठ जिम्मेवारीबाट हट्ने भएका हुन् ।
सुरूमा चेन अस्पतालका सञ्चालक व्यापारीलाई मन्त्री बनाएको भन्दै उनको आलोचना भएको थियो । तर, पछिल्लो समय राज्यमन्त्रीका रुपमा श्रेष्ठले राम्रो काम गर्ने कोशिस गरेको चर्चा हुँदै आएको छ ।
आलोचना भएपछि राज्यबाट पाउने सेवा सुविधा नलिने घाेषणा गरेका उनले हालसम्म कुनै सेवा सुविधासमेत लिएका छैनन् । प्रधानमन्त्री देउवाले भने श्रेष्ठलाई नै स्वास्थ्यमन्त्रीमा निरन्तरता दिने अडान राखेका थिए । अरु थुप्रै केन्द्रीय सदस्यसमेत भइसकेका वरिष्ठ नेताहरुले पनि अवसर नपाएका कारण श्रेष्ठलाई राज्यमन्त्रीबाटै हटाउनुपर्ने दबाब देउवामाथि छ ।
एक नेताले भने देउवाले श्रेष्ठलाई विनाविभागीय मन्त्रीको रुपमा जिम्मेवारी पाउने सम्भावना रहेको बताए । सत्ता गठबन्धन शीर्ष नेताहरुले बिहीबारको बैठकबाट मन्त्रालय बाँडफाँटको विषय टुंग्याएर शुक्रबार मन्त्रिपरिषद् विस्तार गर्ने सहमति जुटाएका छन् ।
