२२ असाेज, काठमाडौं ।
दिल्ली भ्रमणमा रहेको नेपाली कांग्रेसको प्रतिनिधिमण्डलले भारतीय जनता पार्टी (भाजपा)का नेताहरुसँग भेटवार्ता गरेको छ ।
सहमहामन्त्री डा.प्रकाशशरण महत नेतृत्वको कांग्रेस नेताको टोलीले बिहीबार साँझ भाजपाका राष्ट्रिय अध्यक्ष जेपी नाड्डासँग भेटवार्ता गरेका हुन्।
भेटमा भाजपाका विदेश विभाग प्रमुख विजय चौथाइवाले र नेता डा. आश्विन जोहर पनि सहभागी थिए । कांग्रेस सहमहामन्त्री डा. प्रकाशशरण महतको संयोजकत्वमा नेताहरु उदयशमशेर राणा र अजय चौरसिया बिहीबार बिहान दिल्ली गएका हुन् ।
कांग्रेस नेता राणाले भाजपा अध्यक्षसँगको भेट सौहार्दपूर्ण भएको र दुई पार्टीबीच सम्बन्ध सुधारका विषयमा केन्द्रित रहेको बताए । उनले भने, ‘कांग्रेस र भाजपाबीचको सम्बन्ध विस्तार गर्नेबारे हामीहरुबीच कुराकानी भयो,’ उनले दिल्लीबाट अनलाइनखबरसँग भने ।
भेटका क्रममा अध्यक्ष नड्डाले भारत र नेपालबीचको सदियौँ पुरानो सम्बन्धको प्रसङ्ग उल्लेख गर्दै भारतले नेपाललाई कहिल्यै पनि ठूलो दाजुको मानसिकताबाट नहेरेको र हेर्न नहुने स्पष्ट गर्नुभएको सहमहामन्त्री डा महतले जानकारी दिए।
उनले भारतीय जनता पार्टी तथा भारत सरकारले नेपाली नागरिकको भावनाको सदैव सम्मान गर्ने भन्दै दुवै देशका नागरिकको भावना बुझेर जनताजनताबीचको सम्बन्धलाई थप विकसित गर्ने पक्षमा भाजपा र नेपाली कांग्रेस लाग्नुपर्ने पनि बताएका थिए ।
भेटका क्रममा नेपाली कांग्रेसका सभापति शेरबहादुर देउवाले भाजपा अध्यक्ष नड्डालाई दिनुभएको नेपाल भ्रमणको निमन्त्रणा आफूले हस्तान्तरण गरेको जानकारी पनि डा महतले दिए।
कांग्रेस नेताहरुले शुक्रबार भारतीय विदेश मन्त्री एस जयशंकरसँग पनि भेट्ने कार्यक्रम छ । शनिबार उत्तरप्रदेशका मुख्यमन्त्री योगी आदित्यनाथसँग भेट्ने कार्यक्रम रहेको कांग्रेसले जनाएको छ ।
यसअघि कांग्रेसको निमन्त्रणमा भाजपाका विदेश विभाग प्रमुख विजय चौथाइवाले नेपाल भ्रमणमा आएका थिए । उनी फर्किएलगत्तै कांग्रेसलाई भारत भ्रमणको निम्तो दिएका हुन् ।
