२ कात्तिक, काठमाडाैँ ।
बाँकेमा घरेलु हिंसाबाट मारिएकी नकुन्नी धोबी र निर्मला कुर्मीको न्यायका लागि १२ दिनदेखि माईतीघरमा धर्ना बसिरहेका पीडित परिवारका सदस्यहरुलाई राष्ट्रिय महिला आयोग र मुस्लिम आयोगले भेटेको छ ।
पीडितको न्यायका लागि भन्दै नेपालगञ्जदेखि २० दिनको यात्रा गरेर काठमाडौं आइपुगेका १५ जना पीडित परिवारका सदस्य तथा महिला अधिकारकर्मीहरुले माइतीघरमा धर्ना दिएका उनीहरुलाई मंगलवार माईतीघरमा महिला आयोग र मुस्लिम आयोगका अध्यक्षहरुले भेट गरेका हुन् । पीडित परिवारले धोबी र कुर्मी दुबैको हत्यारालाई कारबाहीको माग गरेका छन् । पीडित परिवारसँगको भेटघाटपछि मुस्लिम आयोगका अध्यक्ष समिम मिया अन्सारीले पीडित परिवारका सदस्यहरुले घटनामा वासा कुर्मीको संलग्नता रहेको र उसलाई कारबाहीको माग गरेको बताए । उनले पीडितका कुराहरु गृहमन्त्री र आइजीपीसँग कुरा गरेर पीडित परिवारलाई तत्काल न्याय दिलाउन पहल गर्ने बताए । उनले स्थानीय सरकारले सही समयमा सही भूमिका खेल्न नसकेको कारण नै नेपालगञ्जदेखि पीडित परिवारका सदस्यहरु हिँडेर काठमाडौं आएको बताए ।
अध्यक्ष अन्सारीले भने, ‘यो विषयमा जानकारी लिनको लागि अहिले हामी माईतीघर आएका छौँ, म काठमाडौं आइपुग्ने बित्तिकै उहाँहरुको समस्या के रहेछन् भनेर बुझ्नका लागि आएको हुँ, उहाँहरुको भनाइ वासा कुर्मीको संलग्नता छ, उसलाई कारबाही गर्नुपर्ने भन्ने भनाइ बुझियो, म यो विषयमा थप गृहमन्त्री र आइजीपी सावसँग कुराकानी गरेर दोषी यदि कोही छ भने तुरुन्त कारबाही गरी अन्यायमा परेकोलाई न्याय दिनुपर्यो, उहाँहरु नेपालगञ्जबाट पैदल यात्रा २० दिन लगाएर काठमाडौं आउनु भनेको रहर नभएर बाध्यता हो, उहाँहरुको घाउलाई मल्हम लगाउने प्रयास गर्नेछौँ, सही छानबिन गर्न अनुरोध गर्नेछौँ, स्थानीय सरकारले नै केस सम्हाल्न सक्थ्यो, तर सही समयमा सही भूमिका नखेलेकोले यहाँ आइपुग्यो ।’
त्यस्तै राष्ट्रिय महिला आयोगकी अध्यक्ष कमला पराजुलीले महिलामाथि भएको हिंसालाई समयमै सम्बोधन गर्नुपर्ने बताइन्। उनले पीडितलाई न्याय र पीडकलाई तत्काल कारबाही गर्नुपर्ने बताउँदै घटनाको छिटो भन्दा छिटो छानबिन गर्नुपर्ने बताइन्।
अध्यक्ष पराजुलीले भनिन्, ‘अहिले महिलाहरुमाथि जुन खालको हिंसा बढीरहेको छ यो हिंसालाई समयमै यसको सम्बोधन गर्नुपर्छ, हिंसा हुनुहुँदैन, जो पीडित हुनुभएको छ, अन्यायमा पर्नुभएको छ, उहाँहरुको स्थानीय तहमै सम्बोधन हुनुपर्छ, उहाँहरुले न्याय पाउनुपर्छ, त्यहाँ न्याय पाउन नसकेर यहाँसम्म आउनु हाम्रो लागि सबैभन्दा धेरै दुःखको कुरा हो, यो घटनाको चाँडो भन्दा चाँडो छानबिन भएर पीडितलाई न्याय हुनुपर्छ, पीडकलाई कानूनबमोजिमको सजाय हुनुपर्छ ।’
अध्यक्ष पराजुलीले पीडितहरु नेपालगञ्जदेखि हिँडेर न्यायका लागि भन्दै काठमाडौंसम्म आइपुग्नु दुखद् भएको बताइन् ।
