३ कात्तिक, एजेन्सी ।
स्पिनर सकिब अल हसन र तीव्र गतिका बलर मुश्ताफिजुर रहमानको उत्कृष्ट प्रदर्शनमा बंगलादेशले आइसिसी टि२० विश्वकप २०२१ मा घरेलु टोली ओमानलाई २६ रनले पराजित गरेको छ ।
समूह बी मा रहेको बंगलादेशले मंगलबार आफ्नो दोस्रो खेलमा ओमानलाई पराजित गर्दै सुपर १२ को सम्भावना जीवित राखेको छ । अल अमरेत क्रिकेट मैदानमा जितको लागि १ सय ५४ रनको विजयी लक्ष्य पछ्याएको ओमानले २० ओभरमा ९ विकेट गुमाउँदै १ सय २७ रन बनायो । ओमानका ओपनर जतिन्दर सिंहले ३३ बलमा ४ चौका र १ छक्का सहित सर्वाधिक ४० रनको योगदान दिए । कश्याप प्रजापतीले १८ बलमा १ चौका र २ छक्का सहित २१ रन बनाए ।
एक समय ओमानले राम्रो सुरुवात गर्नेक्रममा ११ ओभरमा ८०–२ को अवस्थामा रहँदै बंगलादेशलाई दबाबमा राखेको थियो । त्यसपछिका ब्याटर चल्न नसक्दा ओमान एक खेल अगावै सुपर १२ मा पुग्ने अवसर गुमाएको छ । जिशान मकसुद १२, अयान खान ९, कलिमुल्लाह ५, सन्दीप गौड र नसिम खुशी ४–४ रनमा आउट भए । मोहम्मद नदीम १२ बलमा १ चौका र १ छक्का सहित १४ रनमा अविजित रहे ।
बंगलादेशका तीव्र गतिका बलर मुश्ताफिजुर रहमानले ४ ओभरमा ३६ रन खर्चेर ४ विकेट लिए । स्पिनर सकिब अल हसनले ४ ओभरमा २८ रन खर्चेर ३ विकेट लिए । मोहम्मद सैफद्दीन र माहेदी हसनले १-१ विकेट लिए ।
त्यसअघि टस जितेर पहिला ब्याटिङ रोजेको बंगलादेश निर्धारित २० ओभरमा १ सय ५३ रनमा अल आउट भएको थियो । बंगलादेशका ओपनर मोहम्मद नईमले ५० बलमा ३ चौका र ४ छक्का सहित सर्वाधिक ६४ रनको योगदान दिए । सकिब अल हसनले २९ बलमा ६ चौका सहित ४२ रनमा रन आउट भए ।
कमजोर सुरुवात गरेको बंगलादेशलाई नईम र सकिबले तेस्रो विकेटका लागि १ सय रनको महत्वपूर्ण शतकीय साझेदारी गरेका थिए । सकिब रन आउट भएसँगै बंगलादेशले लगातार विकेट गुमाएको थियो । बंगलादेशका ८ खेलाडीले दोहोरो अंकमा रन बनाउन सकेनन् । कप्तान मोहमुदूल्लाह रियाद १० बलमा १ चौका र १ छक्का सहित १७ रनमा आउट भए । लिटन दास ६, माहेदी हसन शून्य, नुरुल हसन ३ र मुश्फिकुर रहिम ६ रनमा आउट भए ।
ओमानका तीव्र गतिका बलर बिलाल खानले ४ ओभरमा १८ रन खर्चेर ३ विकेट लिए । अर्का तीव्र गतिका बलर फैज बुटले ४ ओभरमा ३० रन खर्चेर ३ विकेट लिए । कलिमुल्लाहले २ र जिशान मकसुदको नाममा १ विकेट रह्यो ।
पहिलो चरणको समूह बीमा रहेको स्कटल्यान्ड २ खेलमा ४ अंकका साथ शीर्ष स्थानमा छ । ओमान २ खेलमा १ मा जित र १ मा हार सहित २ अंक जोड्दै दोस्रो स्थानमा छ । बंगलादेश २ खेलमा १ मा जित र १ मा हार सहित २ अंकका साथ नेटरनरेटको आधारमा तेस्रो स्थानमा छ । पपुवा न्युगिनी सुरुवाती दुई दुबै खेलमा हारका साथ समूह चरणबाटै बाहिरिने पहिलो टोली बनेको छ ।
बंगलादेशले बिहीबार पपुवा न्युगिनीसँग खेल्नेछ । सुपर १२ मा पुग्न बंगलादेशले उक्त खेलमा फराकिलो जित निकाल्नुपर्ने हुन्छ । पराजित भएमा स्वत बाहिरिने छ । बंगलादेश फराकिलो जितले मात्र सुपर १२ मा पुग्ने छैन । अन्य टोलीको नतिजामा पनि भर पनुपर्ने हुन्छ ।
