४ कात्तिक, हेटौंडा ।
बागमती प्रदेशसभाको बैठक बिहीबार दिउँसो ३ बजेका लागि सारिएको छ । दिउँसो १ बजे बैठक बोलाइए पनि प्रदेशसभा सचिवालयले सांसदहरुलाई एसएमएस गरेर बैठक दुई घण्टा पछि सरेको जानकारी गराएको छ ।
निर्धारित १ बजेको बैठकमा नेकपा एमालेका सांसदहरु आइनपुगेकाले बैठक सारिएको प्रदेशसभा सचिवालय स्राेतले जनाएकाे छ । नेकपा एमालेले पार्टीको अधिवेशनको कामले गर्दा बिहीबारको प्रदेशसभा बैठकमा सहभागी हुन नसक्ने भन्दै कात्तिक ११ पछि बैठक राख्न आग्रह गरेको थियो ।
तर सभामुखले बैठक राखेपछि एमालेले आफूहरु सहभागी नहुने बताएको थियो । मन्त्रीहरुको दबाबपश्चात् मुख्यमन्त्री अष्टलक्ष्मी शाक्य प्रदेशसभाको बैठकमा सहभागी हुन राजी भएकी हुन् । प्रदेश सरकार प्रवक्ता तथा भौतिक पूर्वाधारमन्त्री केशवराज पाण्डेले भने एमाले सांसदहरु बिहीबारको बैठकमा सहभागी हुने बताएका छन् ।
आजको बैठकमा मुख्यमन्त्री अष्टलक्ष्मी शाक्यले विश्वासको मत लिने कार्यसूची छ ।
