९ कात्तिक, काठमाडौं।
रक्षामन्त्री डा मीनेन्द्र रिजालले काभ्रेपलाञ्चोकको साँगा भञ्ज्याङमा निर्माणाधीन राष्ट्रिय प्रतिरक्षा विश्वविद्यालयको निरीक्षण गरेका छन् । रक्षा मन्त्रालयको जिम्मेवारी सम्हालेपछि मन्त्री डा रिजालले नेपाली सेनाको संरचनाबारे जानकारी लिने क्रममा निर्माणाधीन विश्व विद्यालयस्थलको अवलोकन भ्रमण गरेका हुन् ।
सरकारले राष्ट्रिय सुरक्षा एवं प्रतिरक्षासम्बन्धी विषयमा उच्च तहको शिक्षा प्रवर्द्धन तथा अध्ययन अनुसन्धान गर्न विसं २०७६ मङ्सिरमा साँगा भञ्जाङमा ७५० रोपनी जग्गा उपलब्ध गराउने निर्णय गरेको थियो ।
उक्त निर्णयअनुरूप उक्त विश्वविद्यालय निर्माणको कार्य अघि बढेको हो । विद्यालयलाई अघि बढाउने क्रममा पूर्वाधार निर्माण समितिसमेत गठन भई काम अघि बढिसकेको छ । रक्षामन्त्री डा रिजालले आजै भक्तपुरको खरिपाटीस्थित नेपाली सैनिक प्रतिष्ठानको समेत निरीक्षण गर्नुभएको छ । उक्त प्रतिष्ठानमा सैनिक अधिकृतमा छनोट भएका शिक्षार्थीलाई तालिम प्रदान गरिन्छ ।
