१५ कार्तिक, काठमाडौं ।
स्रोत नखुलेको नगद र गहनासहित कैलालीबाट ३ जना पक्राउ परेका छन्।
गोप्य सूचनाको आधारमा सुदूरपश्चिम प्रदेश प्रहरी कार्यालय दिपायल र जिल्ला प्रहरी कार्यालय कैलालीबाट खटिएको प्रहरी टोलीले धनगढीबाट ३ जनालाई पक्राउ गरेको हो।
पक्राउ पर्नेमा बझाङको मष्टा गाउँपालिका–१ कोटदेवल घर भएका २२ वर्षीय मुकेश खड्का, २४ वर्षीय नारायण खड्का र १८ वर्षीय किरण खड्का छन्।
धनगढी उपमहानगरपालिका–५ स्थित हटल अमन प्लाजामा बसिरहेका उनीहरुको कोठा तलासी गर्दा प्रहरीले ८ लाख ६९ हजार रुपैयाँ नगद, ३ हजार २०० भारतीय रुपैयाँ, सुनका गहना ३४.३६० ग्राम र चाँदीका गहना ७३७.८७ ग्राम बरामद गरेको हो।
पक्राउ परेका तीनै जनामाथि थप अनुसन्धान र आवश्यक कारबाहीका लागि नगद तथा गहनासहित राजश्व अनुसन्धान कार्यालय कोहलपुर बाँके पठाइएको जिल्ला प्रहरी कार्यालय कैलालीले जानकारी दिएको छ।
