२१ कार्तिक, काठमाडौं ।
पूर्वप्रधानमन्त्री डा. बाबुराम भट्टराईले आफ्नी छोरी मानुषी ०५१ सालपछि बेलायत गएको प्रमाणित गर्न एमाले अध्यक्ष केपी ओलीलाई चुनौति दिएका छन् ।
काठमाडौंमा आइतबार आयोजित एक कार्यक्रममा ओलीले डा. भट्टराईलाई छोरी मानुषीलाई बेलायतमा राखेर कुन आम्दानीले पढाएको भन्ने प्रश्न गरेका थिए ।
‘हामी बेलायत जाने भिसा पाउँदैनथ्यौँ । बाबुरामका छोराछोरीले भिसा पाउँथे । कसरी होला ? के जादु होला त्यसमा भन्नूस् त ? एउटा भूमिगत क्रान्तिकारी नेताका छोराछोरीको बाउको नाउँ त चाहिन्छ, नागरिकता चाहिन्छ पासपोर्ट पाउन ।
कुन पासपोर्टबाट जानुभएको थियो ? कहाँ भिसा लगाउनुभएको थियो बाबुरामजी बताउनुस् त ?’ ओलीले भनेका थिए, ‘तपाईंका छोराछोरीले बेलायतको शिक्षा, जहाँ कमसेकम २–४–५ लाख महिनाको खर्च हुन्छ, छोराछोरी कसरी पढाउनुभएको थियो भूमिगत हिँड्दा ? कहाँको आम्दानीले ?’
ओलीको भनाइ प्रतिवाद गर्दै डा. भट्टराईले ट्विट गरेका छन्, ‘मित्र खड्गप्रसादजी, पूर्वप्रधानमन्त्रीजस्तो मान्छेले तथ्यहीन उडन्ते कुरा गर्नु शोभनीय भएन । हाम्री छोरी मानुषी सात वर्षको उमेरमा जनयुद्धपूर्व २०४९–५१ मा आमा हिसिला छात्रवृत्तिमा बेलायत पढ्न गएको बेला सँगै गएर सँगै फर्केकी हुन् । त्यसयता उनी बेलायत गएको प्रमाणित गर्नोस् न !’
