२२ कात्तिक, काठमाडौँ ।
पाँच दलीय सत्ता गठबन्धनको बैठक आज साँझ ५ बजे बालुवाटारमा बस्ने भएको छ ।
आज प्रधानमन्त्री शेरबहादुर देउवा र नेकपा (माओवादी केन्द्र) का अध्यक्ष पुष्पकमल दाहाल (प्रचण्ड) बीच भेटपछि आज साँझ ५ बजे गठबन्धनको बैठक बोलाउने सहमति भएको अध्यक्ष दाहालका प्रेस संयोजक विष्णु सापकोटाले जानकारी दिए ।
बैठकमा सरकारलाई कसरी प्रभावकारी बनाउने भन्ने विषयमा छलफल हुने बताइएको छ । त्यस्तै सरकारका काम कारबाही, न्यायालयको बारेमा र राजदूत नियुक्तिलगायत विभिन्न विषयमा छलफल हुने समेत बताइएको छ ।
पाँच दलीय गठबन्धनमा नेपाली काँग्रेस, नेकपा (माओवादी केन्द्र), नेकपा एकीकृत समाजवादी, जनता समाजवादी र राष्ट्रिय जनमोर्चा रहेका छन् । चार दल सरकारमा रहेका छन् भने राष्ट्रिय जनमोर्चा सरकार बाहिरै बसेर समर्थन गरिरहेको छ ।
