२३ कात्तिक, विराटनगर ।
जिल्ला कारागार मोरङमा मंगलबार बिहान कैदीबन्दीबीच दोहोरो झडप भएको छ । विराटनगरको हाटखोलामा रहेको साे काररागारमा दुई पक्षबीच बिहान १० बजेतिर झडप हुँदा ६ जना कैदीबन्दी घाइते भएका छन् ।
कारागारका निमित्त जेलर रामप्रसाद पोखरेलका अनुसार आन्तरिक प्रशासनप्रति कैदीबन्दीले असन्तुष्टि व्यक्त गरेपछि दोहोरो झडप भएको पाइएको छ । कारागारका चौकीदार र नाइकेको समूहसँग अरु कैदीबन्दीको झडप भएको जानकारी उनले दिए ।
कैदीबन्दीहरुले चौकीदार किरण गुरुङले शोषण गरेको भन्दै उनीसहित सहित १४ जनालाई एउटा कोठामा थुनिदिएका थिए। त्यसपछि झडपको स्थिति सिर्जना भएको थियो। अहिले भने स्थिति सामान्य भइसकेको पोखरेलले जानकारी दिए।
चौकिदारले अनाश्वयक यातना दिने, आर्थिक शोषण गर्ने जस्ता काम गरको कैदीबन्दीहरुले आरोप लगाएका छन्। झडपमा घाइते हुने कैदीबन्दीमा चौकीदार गुरुङ र नाइकेहरु शेखर राई, निर्मल ढकाल, बिशाल मुक्ताङ, डिल्ली देवान र सूर्यदीप गुप्ता छन्।
उनीहरुलाई उपचारका लागि कोसी अस्पताल विराटनगर पठाइएको छ। झडपमा उत्रिने कैदीबन्दीलाई समेत अर्को कारागारमा सार्ने तयारी भएको पोखरेलले बताए।
