२४ कात्तिक, काठमाडौं।
गायक योगेश्वर अमात्यको जग्गाको नक्कली लालपूर्जा बनाएर १९ करोड रुपैयाँ ऋण लिएको घटनामा कुमारी बैंककै भूमिका शंकास्पद देखिएको छ। अमात्यको बारास्थित जग्गाको नक्कली पूर्जा बनाएर ऋण प्रवाह गरिएको घटनामा बैंकले नै तथ्य लुकाएको पाइएको प्रहरीको केन्द्रीय अनुसन्धान ब्यूरो (सीआईबी)ले जनाएको छ ।
गायक अमात्यको बाराको विश्रामपुरमा बिरुवा भूमि वनकाली कम्पनीको नाममा १२ बिघा जग्गा थियो। उक्त जग्गा नै अर्कै कम्पनीमा रहेको भन्ने कागजात बनाएर योजनाबद्ध तरिकाले १९ करोड रुपैयाँ हत्याउन नक्कली लालपूर्जा बनाएको खुलेको छ। मालपोतमा भने अमात्यकै कम्पनी बिरुवाको नाममा उक्त जग्गा छ।
हाल सीआईबीको हिरासतमा रहेका काठमाडौंका एसके महर्जन, मुक्तिलाल गौतम र कुसुम प्रधान घरजग्गा कारोबारी हुन्। उनीहरु तीनै जनाबीच पहिले नै चिनजान रहेको र सहकार्यमा काम हुँदै आएको पाइएको छ।
घरजग्गाको काम गर्ने सिलसिलामा एसके र मुक्तिलालले कुसुमसँग ९ करोड रुपैयाँ लिन बाँकी रहेको उनीहरुले प्रहरीसमक्ष बयान दिएका छन्। ९ करोड रुपैयाँ लिन खोज्दा उल्टै आफूहरु फसेको उनीहरुले बयान दिएका छन् ।
सीआईबीका प्रमुख, प्रहरी नायव महानिरीक्षक (डीआईजी) धीरजप्रताप सिंहका अनुसार एसके र मुक्तिलालको ९ करोड रुपैयाँ तिर्नुपर्ने भएपछि कुसुमले बारामा रहेको १२ बिघा जग्गा नै उनीहरुको कम्पनीको नाममा नामसारी गरिदिने बताएका थिए। सोही अनुसार एसके र मुक्तिलालको डेनियल ट्रेडिङको नाममा उक्त जग्गा नामसारी गरेर लालपूर्जा समेत निकाल्ने काम कुसुमले नै गरेको भेटिएको छ ।
नक्कली लालपूर्जा बनाएर उनीहरुको कम्पनीको नाममा १२ बिघा जग्गा रहेको प्रमाण जुटाउने काम कुसुममार्फत भएको अनुसन्धानबाट खुलेको छ। कुसुमले नक्कली लालपूर्जा बनाएर आफूलाई फसाउन खोजेको भन्नेबारे आफूहरुलाई केही थाहा नभएको एसके र मुक्तिलालको दाबी छ। आफ्नो कम्पनीको नाममा आएको उक्त जग्गा राखेर १९ करोड ऋण लिइसकेपछि बैंकबाट जग्गा नै अर्काको नाममा रहेकाले ऋण असुली गर्न आउनु र्पयो भन्दै खबर गरेपछि मात्रै कुसुमले नक्कली कागजात बनाएर जग्गा दिएको थाहा पाएको एसके र मुक्तिलालले प्रहरीमा बयान दिएका छन्।
यस प्रकरणमा प्रहरीले अहिलेसम्म पर्सास्थित कुमारी बैंक शाखाका ऋण अधिकृत सोनु ठाकुर, मूल्याङ्कनकर्ता राजेश चौरसिया, काठमाडौंका एसके महर्जन, मुक्तिलाल गौतम र अर्का बिचौलिया कुसुम प्रधानलाई पक्राउ गरेको छ। बैंकका कर्मचारीसहित ४ जना अझै फरार छन्।
