४ मंसिर, काठमाडौं ।
नेपाली कांग्रेसका महामन्त्री डा. शशांक कोइराला र पूर्व महामन्त्री प्रकाशमान सिंहबीच भेटवार्ता भएको छ । शनिबार महामन्त्री कोइराला नेता सिंहलाई भेट्न उनको निवास चाक्सबारी पुगेका थिए ।
भेटवार्ताको सुरुवातमै आफ्नो यसअघिको अभिव्यक्तिबाट रिसाएको भन्दै शशांकले प्रकाशमानसँग माफी मागेका छन् । उनले भने, ‘सरी प्रकाशमानजी !’
भेटमा संस्थापनइतर समूहबाट साझा उम्मेदवार तय गर्नेबारे छलफल भएको बताइएको छ । महामन्त्री कोइरालाले केही दिनअघि सिंहबारे गरेको टिप्पणीका कारण दुई नेताबीच दूरी बढेको बताइएको थियो । एक भाषणमा शशांकले प्रकाशमानलाइ काठमाडाैं बाहिरका मान्छेले नचिन्ने टिप्पणी गरेका थिए । सिंहलाई भेटेर कोइरालाले मिडियामा आएजस्तो आफूले अवमूल्यन नगरेको बताएका छन् ।
‘तपाईं कांग्रेसको उपसभापति र महामन्त्री भइसकेको नेता हो । काठमाडौंमा तपाईंको पकड बलियो छ भन्ने मेरो आशय हो । अन्यथा नलिनुहोला’, भेटमा कोइरालाले भनेका छन् ।
सिंहले आफू सभापति लड्ने तयारीमा रहेकोले सहयोग गर्न कोइरालासँग आग्रह गरेका छन् । दुई नेताबीचको छलफलले हार्दिकता बढाउन सहयोग गर्ने उनीहरु निकट नेताहरुले बताएका छन् ।
