१३ मंसिर, चितवन ।
एमाले निवर्तमान अध्यक्ष केपी ओलीले संसदीय दलका प्रमुख सचेतक विशाल भट्टराईलाई केन्द्रीय कमिटीमा अटाएनन् ।
ओलीनिकट भनेर चिनिएका भट्टराई दशौँ महाधिवेशनमा ओलीको कोटामा नपर्नुलाई आश्चर्यको रूपमा हेरिएको छ । भट्टराई नवौँ महाधिवेशनमा ओलीको टिमबाट वैकल्पिक केन्द्रीय कमिटीमा निर्वाचित भएका थिए ।
त्यसैगरी, एमाले र माओवादी केन्द्रको एकीकरण कालमा भट्टराई केन्द्रीय सदस्य बनेका थिए । नेकपा विवादको बेलामा विभाजन रोक्न मध्यस्थताको भूमिका खेल्ने २२ जना सांसदमा भट्टराई पनि पर्दथे ।
नेकपा विभाजनपछि पुर्नगठन भएको मन्त्रिपरिषदमा भट्टराईले मन्त्रीको आशा गरेका थिए । ओलीले त्यतिबेला मन्त्री नबनाएर उनलाई संसदीय दलको प्रमुख सचेतक बनाएका थिए । दशौँ महाधिवेशनको बन्दसत्रले एमाले विभाजनपछि कायम रहेका १९८ केन्द्रीय सदस्यलाई कायम राखेर ३०१ सदस्यीय पुर्याउने सहमति जुटाएको थियो ।
१९८ सदस्यभित्र पर्ने भट्टराईलाई छुटाएका ओलीले प्रदेशमा काम गर्न आग्रह गरेको नेता भट्टराईले बताए । अध्यक्ष ओलीले भट्टराईलाई प्रदेश १ को अध्यक्ष बनाउने आश्वासन दिएका छन् ।
