१ पुस, काठमाडौं ।
नेपाली काँग्रेसका प्रवत्ता विश्वप्रकाश शर्माले महामन्त्रीमा आफ्नो जीत सुनिश्चित हुँदै गएपछि यो गुटको होइन, काँग्रेसको जीत भएको प्रतिक्रिया दिएका छन् ।
उनी यतिबेला मतगणनास्थलमा पुगेका छन् । महामन्त्रीको जारी मत गणनाको हालसम्मको परिणाममा शर्मा दोस्रो स्थानमा रहेका छन् । कांग्रेस महामन्त्रीमा दुई जना निर्वाचित हुनेछन् । महामन्त्रीका अर्का उम्मेदवार गगन थापा जितनजिक देखिएका छन् । शर्मा थापालाई पछ्याउँदै छन् ।
मतगणनास्थलमा पुग्दै गर्दा शर्माले यो गुटको नभइ समग्र कांग्रेसको जित भएको प्रतिक्रिया दिएका छन् । यो गुटको जित होइन, यो समग्रमा नेपाली कांग्रेसको जित हो, शर्माले भने, मैले जुन माटोलाई छोएर उम्मेदवारी घोषणा गरेको थिए, त्यही माटोलाई छोएर जिम्मेवारी लिन्छु ।
सुन्दरीजलस्थित बीपी संग्रहालयमा पुगेर शर्माले महामन्त्रीमा उम्मेदवारी घोषणा गरेका थिए । आज साढे ४ बजे आफू सुन्दरीजल पुग्ने शर्माले बताए ।
