४ पुस, विराटनगर ।
नेपालमा राजासहितको हिन्दु राष्ट्रको वकालत गर्दै त्यसै अनुशारको राजनीतिक अभियान चलाईरहेको राष्ट्रिय प्रजातन्त्र पार्टी राप्रपाको एकता महाधिवेशनपछि अध्यक्षमा पराजित भएका कमल थापा अहिले विरक्तिए झै देखिएका छन् ।
महाधिवशेनपछि आफ्ना हरेक सार्वजनिक अभिब्यक्तिलाई पूर्व राजा ज्ञानेन्द्र र राजसंस्थामा केन्द्रित गर्दै आएका थापाले पार्टीमा ज्ञानेन्द्रको प्रत्यक्ष हस्तक्षेपदेखि राजसंस्थाको औचित्यमाथि समेत प्रश्न उठाउदै आएका छन् । राप्रपामा राजाको भूमिका देखेका उनले त्यसलाई पार्टी हित र भविष्यका लागि निको मानेका छैनन् ।
यसैकारण उनले आफ्ना अभिब्यक्तिमा राजसंस्था र ज्ञानेन्द्रलाई निशाना बनाउदै आएका छन् । आइतबार मात्रै राप्रपाका पूर्वअध्यक्ष थापाले राजसंस्था पुनःस्थापनाको लागि राजनीतिक दल र आम जनताको विश्वास हुनुपर्ने भन्दै अहिले निर्मल निवासबाट भइरहेका गतिविधि त्यसका लागि सहयोगी नरहेको टिप्पणी गरेका छन् ।
राप्रपा महाधिवेशनमा आफूविरुद्ध पूर्वराजा ज्ञानेन्द्रसहित निर्मल निवासबाट अवाञ्छित गतिविधि भएको भन्दै छानबिनको माग गरिरहेका थापाले दलको आन्तरिक मामिलामा राजसंस्थाले हस्तक्षेप गरेको आरोप लगाएका छन् ।
राजासहितको हिन्दू राज्यको पक्षमा सडक र सदनमा आवाज उठाउन अग्रणी भूमिका खेलेका पूर्वउपप्रधानमन्त्री थापाले विदेशी गुहारेर,दलको आन्तरिक मामिलामा हस्तक्षेप गरेर राजसंस्था फर्काउन नसकिने बताएका छन् । पूर्व राजा ज्ञानेन्द्र शाहप्रति संकेत गर्दै उनले विदेशीलाई गुहारेर वा दलहरुमा हस्तक्षेप गरेर र सडकमा अस्थिरता खडा गरेर राजसंस्था फर्काउन नसक्ने उनले ठोकुवा गरेका छन् ।
थापाले सामाजिक सन्जालमार्फत लेखेका छन्, ‘राजनीतिक दल र आम जनताको बिश्वास नै राजसंस्था पुनःस्थापनाको एकमात्र बाटो हो । बिदेशी गुहारेर, दलको आन्तरिक मामिलामा हस्तक्षेप गरेर र राजनीतिक दलहरूविरुद्ध घृणा फैलाएर राजसंस्था फर्कँदैन ।
सडकमा अस्थिरता खडा गरेर राजसंस्था फर्काउन सकिन्छ भन्ने निर्मल निवासको सोचाइ गलत र प्रत्युत्पादक छ ।’ यस्तै थापाले पार्टी महाधिवेशनमा निर्मल निवासको हस्तक्षेप निर्वाचनमा हारजितसँग मात्र सम्वन्धित नभएको बताएका छन् । उनले ट्वीट गर्दै भनेका छन् ।
पार्टी महाधिवेशनमा निर्मल निवासको हस्तक्षेप निर्वाचनमा हारजितसँग मात्र सम्वन्धित छैन् । राजा सबैको साझा हुन्छ भन्ने राप्रपाको मान्यता विरुद्धको गंभीर आघात हो।यसवारेमा मैले पार्टी अध्यक्षलाई पत्र लेखेर केन्द्रीय समितिमा छलफलको निम्ति आग्रह गरेको छु।आशा छ,मेरो आग्रहको उपेक्षा हुनेछैन् ।
