१९ पुस, विराटनगर ।
पाकिस्तानका पूर्व कप्तान तथा स्टार अलराउन्डर मोहम्मद हफिजले अन्तर्राष्ट्रिय क्रिकेटबाट सन्न्यासको घोषणा गरेका छन् ।
हफिजले सोमबार एक पत्रकार सम्मेलन गर्दै सन्न्यास लिएका छन् । ४१ वर्षिय हफिजले पाकिस्तानबाट ५५ टेस्ट, २ सय १८ ओडिआई र १ सय १९ टि२० आई खेल खेलेका छन् । ‘१८ वर्षअघि मैले पाकिस्तान क्रिकेट टोलीमा एउटा यात्रा सुरु गरेको थिए ।
त्यसको म आज औपचारिक रुपमा सन्न्यास लिन चाहन्छु । धेरै खुसी र राम्रोको साथ सन्न्यास लिएको छु’, हफिजले भने । हफिजले १ सय ५ टेस्ट इनिङमा १० शतक र १२ अर्धशतक सहित ३ हजार ६ सय ५२ रन बनाउनुको साथै ५३ विकेट लिएका छन् ।
हफिजले सन् २००३ मा बंगलादेशविरुद्ध टेस्टमा डेब्यू गरेका थिए । हफिजले यस अघिनै टेस्टबाट सन्न्यास लिई सकेका थिए । २०१५ मा बंगलादेशविरुद्ध २ सय २४ करिअरको उत्कृष्ट प्रदर्शन गरेका थिए । २०१४ मा न्युजिल्यान्डविरुद्ध खेलेको १ सय ९७ र २०१२ मा श्रीलंकाविरुद्ध खेलेको १ सय ९६ रन यादगार प्रदर्शनमा पर्दछन् ।
हफिजले ओडिआईमा २००३ अप्रिलमा जिम्बावेविरुद्ध डेब्यू गरेका थिए । ओडिआईमा ११ शतक र ३८ अर्धशतक सहित ६ हजार ६ सय १४ रन बनाएका छन् । उत्कृष्ट प्रदर्शन २०१३ मा श्रीलंकाविरुद्ध १ सय ४० रन अविजित थियो । ओडिआईमा १ सय ३९ विकेट लिएका थिए ।
टि२० आईमा हफिजले २ हजार ५ सय १४ रन बनाउनुको साथै ६१ विकेट लिएका छन् । पाकिस्तानले २००९ को टि२० विश्वकप जित्दा हफिज टोलीमा महत्वपूर्ण सदस्य थिए । २०१७ मा च्याम्पियन्स ट्रफीको उपाधि, २००७ को टि२० विश्वकप फाइनल र यस वर्षको टि२० विश्वकप सेमिफाइनल यात्रामा उनी टोलीमा थिए ।
हफिजले पाकिस्तानका लागि पहिलो खेल खेल्नु र टि२० विश्वकपमा भारतलाई १० विकेटले हराउनु करिअरको उत्कृष्ट क्षण बताए । हफिजले घरेलु र फ्रेन्चाइज क्रिकेट भने खेल्नेछन् ।
