१७ फागुन, वीरेन्द्रनगर ।
लामो समयको विवादपछि प्रतिनिधीसभाबाट आइतबार अनुमोदन भएको अमेरिकी सहयोग सम्झौता एमसीसीको असर कर्णाली प्रदेशको राजधानी वीरेन्द्रनगरमा परेको छ ।
एमसीसी सम्झौता पारित गरेको विरोधमा जारी प्रदर्शन उग्र बन्दै गएपछि स्थिति नियन्त्रणभन्दा बाहिर जान नदिन त्याहा कर्फ्यू आदेश जारी गरिएको छ । सोमबार राति आठ बजेदेखि मंगलबार साँझ साढे सात बजेसम्म कर्फ्यू आदेश जारी गरिएको सुर्खेतका प्रमुख जिल्ला अधिकारी खगेन्द्रप्रसाद रिजालले बताएका छन् ।
प्रमुख जिल्ला अधिकारी रिजालले कर्फ्यू आदेश उल्लङ्घन गर्नेलाई गोलीसमेत हान्न सकिने आदेश जारी गरिएको बताएका छन् । प्रहरीले २३ प्रदर्शनकारीलाई नियन्त्रणमा लिएको छ भने झडपमा इन्सपेक्टरसहित १८ प्रहरी घाइते भएका छन् ।
घरबाहिर ननिस्कन आग्रह गर्दै माइकिङ गरिरहेका प्रहरीमाथि प्रदर्शनकारीले ढुंगा प्रहार गरेका हुन् । ढंगा प्रहारबाट नगर प्रहरी प्रमुख लालबहादुर सुनार पनि घाइते भएका छन् । जिल्ला प्रशासन कार्यालयका अनुसार वीरेन्द्रनगरको पूर्वमा इत्राम खोला, पश्चिममा बाङ्गेसिमल, उत्तरमा कपासे ब्यारेक र दक्षिणमा रत्नराजमार्गको ५ सय मिटर क्षेत्रसम्म कर्फ्यू लाग्ने छ ।
एमसीसी अनुमोदनको विरोधमा बन्द आह्वान गरेका दलका कार्यकर्ताहरुले सोमबार नेकपा एमालेको पार्टी कार्यालयमा आगो लगाए थिए । उनीहरुले नेपाली कांग्रेस र नेकपा माओवादी केन्द्रको पार्टी कार्यालयमा पनि तोडफोड गरेका छन् । मंगलबार बिहानैदेखि वीरेन्द्रनगरमा व्यापक प्रहरी परिचालन गरिएको प्रशासनले जनाएको छ ।
प्रहरीले सडकमा ननिस्कन आग्रह गरेको छ । सोमबार दिनभर नेपाल बन्दको दिन वीरेन्द्रनगरको अवस्था तनावग्रस्त थियो । सोमबार नेत्रविक्रम चन्द विप्लव नेतृत्वको नेकपासहित ६ दलले नेपाल बन्द घोषणा गरेका थिए । बन्दको क्रममा आयोजित प्रदर्शन प्रहरीसँगको झडपमा परिणत भएको थियो ।
प्रदर्शन उग्र बन्दै गएपछि वीरेन्द्रनगरका मुख्य चोकहरूमा प्रहरी परिचालन गरिएको थियो । प्रहरीले बेलुका पाँच बजेपछि आन्दोलन साम्य हुने अपेक्षा गरेको थियो । तर साँझ बन्दकर्ताहरू झन् उग्र बन्द गर्दै ढुंगामुढा बर्साउँदै बजार परिक्रमा गरेका थिए ।
प्रमुख जिल्ला अधिकारी रिजालका अनुसार बन्दकर्ताहरूले अहिले पनि लुकिछिपी प्रहरीमाथि ढुङ्गा हान्ने क्रम जारी रहेको छ । सोमबार बन्दकर्ता र सुरक्षाकर्मीबीच भएको झडपमा प्रहरीले तीन दर्जन भन्दा बढी राउन्ड अश्रुग्याँस प्रहार गरेको थियो ।
