२१ फागुन, धनुषा । आजदेखि जनकुपर–पोखरा हवाइ उडान सुरु भएको छ । आज भएको पहिलो उडानमा गण्डकी प्रदेशका मुख्यमन्त्री कृष्णचन्द्र नेपाली पोखरेल पोखराबाट जनकपुर आइपुगे ।
जनकपुर–पोखरा हवाइ उडान सुरु भएपछि पहिलो उडानमा मधेस भ्रमणमा जनकपुर आएका मुख्यमन्त्री पोखरलले सञ्चारकर्मीसँग कुराकानी गर्दै संघीयतालाई बलियो बनाउन र प्रदेश प्रदेशबीचको सम्बन्धलाई बलियो बनाउनुपर्ने आवश्यक्ता रहेको बताए ।
उनले पोखरा पर्यटकीय गन्तव्य रहेको र जनकपुर धार्मिक पर्यटकीय क्षेत्र भएकाले दुवै प्रदेशबीचमा पर्यटकीय विकास गरेर यसबाट लाभ लिन सकिने बताए ।
मुख्यमन्त्री पोखरेलले मधेस प्रदेश र गण्डकी प्रदेशबिच सहकार्यबाट समृद्धि हुन सक्ने र समृद्धिका क्षेत्रहरुको खोजी गरेर अगाडि बढन आफूहरु तयार रहेको पनि बताए ।
यसैगरि मधेस प्रदेशका पर्यटनमन्त्री शत्रुधन महताले दुवै प्रदेशबीच सहकार्यबाट पर्यटन क्षेत्र लाभान्वित हुन सक्ने बताए ।
जनकपुर विमान स्थलमा मख्यमन्त्री पोखरेललाई मधेस प्रदेशका पर्यटनमन्त्री शत्रुधन महतो, भौतिक पूर्वाधार तथा यातायात मन्त्री रामसरोज यादव, सुरक्षा निकायका प्रमुखहरुले स्वागत गरेका थिए ।
