काठमाडौं, साउन ३१
नेपाली राष्ट्रिय टोलीका लेग स्पिनर सन्दीप लामिछानेले क्यारेबियन प्रिमियर लिग (सीपीएल) मा आफ्नो जादु कायमै राखेका छन् । बिहीबार जमाइका तल्लावाजविरुद्ध सन्दीपले २१ रन खर्चेर २ विकेट लिए ।
सेन्ट किट्स एन्ड नेभीस प्याट्रियट्सका लागि खेलिरहेका सन्दीपले जमाइकाका ओपनर केनर लेविस २३ बलमा ४९ रनको आक्रमक इनिङ्स खेलिरहँदा कुपरको हातबाट क्याच आउट गराए । त्यसको दुई बलमै उनले आन्द्रे मकार्थीलाई क्लिन बोल्ड गरे । सन्दीपले ४ ओभरमा २१ रन खर्चेपनि अन्य बलरले राम्रो साथ दिएनन् ।
जमाइकाले २० ओभरमा ४ विकेट गुमाउँदै १ सय ७८ रनको योगफल खडा गरेको थियो । जवाफमा प्याट्रियट्सले ९ विकेट गुमाउँदै १ सय ३१ रनमात्र बनाउन सक्यो । कप्तान तथा ओपनर क्रिस गेलले २४ रन बनाउनुबाहेक अन्य ब्याट्सम्यान चल्न सकेनन् । सन्दीपले प्रतियोगिताको तीन खेलमा ५ विकेट लिइसकेका छन् । उनले प्रतियोगिताको मध्य पाटो भने राष्ट्रिय टोलीमा आउनुपर्ने कारण गुमाउने छन् ।
