९ चैत्र, काठमाडौं ।
नेकपा माओवादी केन्द्रका नेता मात्रिका यादवले पूर्व जनमोर्चा समूहलाई धेरै भूमिका दिइएको भन्दै असन्तुष्टि जनाएका छन्।
यादवले लिखित रूपमै आफ्ना असन्तुष्टि पार्टीमा बुझाएका छन्। उनले पार्टीमा संघर्ष गरेका कार्यकर्तालाईभन्दा एकता प्रक्रियाबाट आएकालाई मौका दिएको भन्दै आपत्ती जनाएका हुन्। ‘मैले पार्टीमा उजुरी दिएको छु। के विषयमा दिएको छु भनेर भन्न मिल्दैन,’ उनले भने, ‘समसामयिक विषयमा उजुरी दिएको छु। यस विषयमा पार्टीमा छलफल होला।’
असन्तुष्टिकै कारण यादवले मंगलबार जनकपुरमा भएको पार्टी प्रशिक्षण कार्यक्रममासमेत सहभागी भएनन्। आफ्नो आवश्यकता नभएकाले प्रशिक्षणमा सहभागी नभएको उनले प्रतिक्रिया दिए।
जनमोर्चाबाट एकता प्रक्रियामा आएका गिरिराजमणि पोखरेल र विश्वनाथ साहलाई धेरै भूमिका दिएको तर ‘जनयुद्व’ मा सहभागी भएकालाई पाखा लगाउने काम गरेको उनको आरोप छ। केन्द्रीय समिति चयन र मधेसको सांगठनिक संरचनामासमेत पूर्व जनमोर्चालाई अगाडि बढाइको उनको गुनासो छ।
यादवले पार्टीमा जनयुद्व लडेका र नलडेका भन्दा पनि वरिष्ठता र खटाइको आधारमा भूमिका दिन माग गरेका छन्।
