काठमाडौं, २८ चैत ।सत्तारुढ पाँच दलीय गठबन्धनले देशभर तालमेल गर्न सयुक्त अपिल जारी गरेकाे छ । पाँच दलीय गठबन्धनका तर्फबाट जारी भएकाे सयुक्त अपिलमा गठबन्धनलाई विजयी गराउने गरी चुनावी अभियानमा हाेमिन आग्रह गरिएकाे छ ।
स्थानीय तह निर्वाचनमा गठबन्धन गरेका दलहरू बीचमा सहमति हुन नसकेको सन्देशलाई चिर्नका पाँच दलीय गठबन्धनका शिर्ष नेताहरूले संयुक्त अपिल जारी गरेका हुन् । प्रधानमन्त्री निवास वालुवाटारमा बसेकाे सत्तारुढ गठबन्धनको शीर्ष नेताहरूको बैठकमा संयुक्त अपिल जारी गर्ने विषयमा सहमति भएको हो ।
कांग्रेस सभापति एवम् प्रधानमन्त्री शेरबहादुर देउवा, नेकपा माओवादी केन्द्रका अध्यक्ष पुष्पकमल दाहाल, नेकपा एकीकृत समाजवादीका सम्मानित नेता झलनाथ खनाल, जनता समाजवादी पार्टीका नेता अशोककुमार राई र राष्ट्रिय जनमोर्चाकी उपाध्यक्ष दुर्गा पौडेलले संयुक्त रूपमा अपिल जारी गर्दै हिजोका सबै मतभेदलाई पर पन्छाउँदै चुनावमा एक अर्कालाई निरन्तर सहयोग गर्ने प्रण पनि गरेका छन् ।
विज्ञप्तिमा भनिएको छ, ‘पाँच दलीय गठबन्धनको अपिल अनेकौँ शहीदहरूको बलिदान र अनगिन्ती सपूतहरूको त्याग, तपस्या, समर्पण र नेपाली जनताको वर्षोंदेखिको अथक संघर्षले नेपालमा संघीय लोकतान्त्रिक गणतन्त्र र समाजवाद उन्मुख समावेशी लोकतन्त्र सहितको नयाँ परिवर्तन आएको छ । नयाँ संविधान जारी भएसँगै मुलुक नयाँ युगमा प्रवेश गरेको छ। समावेशिता, गणतन्त्र र स्थायित्वको दिशामा मुलुक अगाडि बढेको छ ।’
परिवर्तलाई आत्मसात गर्न नसक्ने र नचाहने कतिपय शक्तिहरू परिवतर्नका विरुद्ध षड्यन्त्र गरिरहेको भन्दै त्यसकाविरुद्ध लड्न अघि बढिरहेको उल्लेख गरेका छन् । देशैभर ठाउँ र अवस्था अनुसार चुनावी तालमेल मिलाएर चुनावमा आपसी सहकार्य र परस्पर सहयोगको भावनाले अगाडी बढ्न उनीहरूले सबैलाई आग्रह गरेका छन् ।
व्यापक सहभागितासहित अगामी स्थानीय तहको निर्वाचन सफल पार्न पाँच दलीय गठबन्धनका उमेदवारहरूलाई अमूल्य मत दिई विजयी बनाउन हुन समेत सबैमा अनुरोध गरिएकाे छ ।
.jpg)
