काठमाडौं, २९ चैत । नेपाली कांग्रेस भरतपुर महानगरपालिकाका २९ वटै वडाका सभापतिहरूले भरतपुरको मेयर नपाए गठबन्धन स्वीकार नगर्ने निर्णय गरेका छन् ।
मंगलबार कांग्रेस चितवनको पार्टी कार्यालयमा बसेको वडा सभापतिहरूको बैठकले गठबन्धनका तर्फबाट मेयर कांग्रेसले नपाए गठबन्धनविरुद्ध जाने निर्णय गरेको हो । उनीहरूले आफूहरूको संयुक्त निर्णय विपरीत गठबन्धन गरिए भरतपुर महानगरमा मेयर-उपमेयर र सबै वडामा अध्यक्षसहितका ५ जना उम्मेदवार खडा गर्ने निर्णय पनि गरेका छन् ।
‘गठबन्धनका लागि हाम्रो बटमलाइन नै भरतपुरको मेयर हो । त्योबाहेकको निर्णय भए सबै ठाउँमा उम्मेदवार उठाउँछौँ भन्ने निर्णय पार्टी सभापतिलाई बुझाएका छौँ,’ भरतपुर–१ का वडासभापति आश्विन श्रेष्ठले भने । बैठकको निर्णय वडा सभापतिहरूले केन्द्रमा पठाउन भन्दै जिल्ला सभापति राजेश्वर खनाललाई हस्तान्तरण गरेका छन् ।
कांग्रेस केन्द्रीय समितिले पुनः माओवादीलाई भरतपुरको मेयर दिने तयारी गरेको भन्ने खबर सुनेपछि वडा सभापतिहरूले यस्तो निर्णय गरेको उनले बताए । कांग्रेसको केन्द्र, जिल्ला र महानगर समितिले गठबन्धन गर्ने निर्णय गरे पनि वडा सभापतिहरूले भरतपुरको मेयर नपाए कुनै पनि गठबन्धन नगर्ने निर्णय गरेका छन् ।
साथै वडा सभापतिहरूले आफूहरूले भनेको नभए गठबन्धनका सबै उम्मेदवारलाई बहिष्कार गर्ने निर्णय पनि गरेका छन् ।
